CMO Gujarat

મુખ્યમંત્રી શ્રી ભૂપેન્દ્રભાઈ પટેલના વરદ્હસ્તે આજે પાટણ ખાતે જીવન જ્યોત ચેરિટેબલ ટ્રસ્ટ સંચાલિત શેઠ શ્રી પોપટલાલ ભીખાચંદ પાટણ જનતા કેન્સર હોસ્પિટલનું ઉદઘાટન કરવામાં આવ્યું હતું. મુખ્યમંત્રીશ્રીએ ઉદઘાટન બાદ હોસ્પિટલના વિવિધ વિભાગોની મુલાકાત લઈ ઉપલબ્ધ અદ્યતન સારવાર સુવિધાઓની જાણકારી મેળવી હતી.

માનનીય વડાપ્રધાન શ્રી નરેન્દ્રભાઈ મોદીએ આજે એકતાનગર ખાતે સરદાર વલ્લભભાઈ પટેલની 151મી જન્મજયંતી નિમિત્તે આયોજિત રાષ્ટ્રીય એકતા દિવસની ઉજવણીમાં ભાગ લઇ રાષ્ટ્રીય એકતા પરેડનું નિરીક્ષણ કર્યું હતું અને રાષ્ટ્રવ્યાપી સંબોધન કર્યું હતું. મુખ્યમંત્રી શ્રી ભૂપેન્દ્રભાઈ પટેલ તથા નાયબ મુખ્યમંત્રી શ્રી હર્ષભાઈ સંઘવી આ અવસરે ઉપસ્થિત રહ્યા હતા. સરદાર સાહેબની વિશ્વની સૌથી ઊંચી પ્રતિમા 'સ્ટેચ્યુ ઓફ યુનિટી'ના સાંનિધ્યમાં દેશભક્તિના માહોલમાં અર્ધ સૈનિક દળોની વિવિધ ટૂકડીઓ દ્વારા દમદાર પરેડ તેમજ વિવિધ રાજ્યોના કલાકારોની સાંસ્કૃતિક નૃત્ય પ્રસ્તુતિઓ અને ટેબ્લો આકર્ષણનું કેન્દ્ર બન્યા હતા. માનનીય વડાપ્રધાનશ્રીએ આ અવસરે સરદાર વલ્લભભાઈ પટેલની જન્મજયંતી નિમિત્તે તેમની દિવ્ય ચેતનાને વંદન કરતા જણાવ્યું હતું કે, એકતા આપણને એક રાષ્ટ્રના રૂપમાં આગળ વધવાની પ્રબળ શક્તિ આપે છે, એટલે આપણા દેશમાં સ્વતંત્રતા દિવસ, ગણતંત્ર દિવસ અને એકતા દિવસ ત્રણેય રાષ્ટ્રીય પર્વને ઉત્સાહ સાથે મનાવવામાં આવે છે. તેમણે ભારતીય ઇતિહાસમાં સરદાર સાહેબના મહાન યોગદાન તેમજ સાંસ્કૃતિક પુનરુત્થાનની રૂપરેખા આપી, છેલ્લા 12 વર્ષોમાં રાષ્ટ્રની વધતી સુરક્ષા, સમૃદ્ધિ, પ્રતિષ્ઠા અને વિકાસ વિશે સૌને માહિતગાર કર્યાં હતા. સાથે જ માનનીય વડાપ્રધાનશ્રીએ સશક્ત ભારતની સંકલ્પ યાત્રાને અવિરત આગળ ધપાવવાની પ્રતિબદ્ધતા વ્યક્ત કરી, સૌના સાથ, સહકાર અને વિશ્વાસ થકી વિકસિત ભારત બનાવવાનો દ્રઢ વિશ્વાસ વ્યક્ત કર્યો હતો. #RashtriyaEktaDiwas2026