أعرف أعذب تفاصيلك و أعرف إنك دوا هالروح
و أعرف إن الحياة تزين لا شفتك تبتسّم لي
و أنا أحبّك وأحب الشعر وبيوت الغزل والبوح
و أحب مْن الليالي المقبله ليلةٍ تجيبك لي
أدرِي تبيني حيل .. و تموت فيني
وأدري وجودي غير عن باقي الناس
وتدري مكانك بين رمشي وعيني
وحبك توزع بين دمي والأنفاس
لاغبت عني ، في خيالي تجيني
تخيل أسرح معك والناس جلاس!
انت حبّك مالقيته على جال الطريق
ماتجيبه غير دعوة حجيجٍ في مِنى
ياعفيفٍ تجمع الزين و الساس العريق
جدك اللي يروي السيف الأملح والقنا
جيت من بطن السحايب كما الغيث الدفيق
تنجي اللي طول عمره حياته في عنا
منهو اللي كسب رضاك يوم إنك تضيق
ويتجرع كل لوعات حزنك غير أنا
كفخ لك قلبي من أقصى معاليق الضلوع وطار
يا حلو أيامي و يا أعذب غلاي و سيّد أفكاري
أنا كل اللي أعرفه أحبك حب بـ أستمرار
وأشوفك راحة أيامي وأشوفك أجمل أقداري
وغريب الدار في حبك ما عاد انه غريب الدار
خذا حلو السنين وجاك لا بايع ولا شاري
ما جفاه لو بيني وبينه خلاف كبير
موفقٍ في أختيار الكلمة اللينة
ماهوب قيس الوحيد اللي عشق بضمير
من عيّنه سيد العشاق من عيّنه؟
حبيت حبٍ ماجربه الغني و الفقير
وأنا أدري أنّ المحبة ماهيب هينة