فيصل السواط

ديواني الشعري / ثريد 1 1- لسى فاكر .. قال : وينك ؟ قلت : انا مسافر وقصيت التذاكر قال : وحدك ؟ قلت : انا و اسمك و شنطة ذكرياتي قال : لـ اي بلاد رايح ؟ ، قلت : يم بلاد " باكر " قال : ليش تروح ؟ قلت : أبعد حياتي عن حياتي قال : ماني فاهمك ! , قلت : افتح الدنيا وذاكر قال : فرقا ؟ ، قلت : فرقا ، واطفي شموع امسياتي قال : ووعودك معي ؟ قلت : - بتناسي - لسى فاكر ؟ قال : كيف انساك ؟ قلت : اجمع شتاتك من شتاتي قال : جايك شوفني فالدرب ، قلت : الوقت حاكر قال : - واللهفه عرق - وش فيك ؟ ، قلت : الماضي اتي قال : صدمه ، قلت : شجره يابسه من ماي عاكر قال : والاسباب ؟ قلت : الصمت يحكي معطياتي قال : تذكر فاللقا الاول دموعك ؟ قلت : ذاكر قال : وش هي ؟ قلت : يمكن حزن متعلق بذاتي قال : والعطر الحقيقي في حديثك ؟ قلت : ماكر قال : والصدق بعيونك ؟ قلت : يكذب عن سكاتي قال : يعني ناكر العشرة و طيبي ؟ ، قلت : ناكر قال : طيّب ، قلت : وين الطيب ؟ ياسارق مباتي قال : شكرا ، قلت : ياما كنت لـ الالام شاكر قال : عفوا , قلت : عفوك كان من ضمن امنياتي قال : هذي رحلتي تزهم ، ووراني : التذاكر قلت : نفس الرحله ، وقال : ايه والمقعد مواتي قلت : صدفه ؟ قال : صدفة مين ؟ يا يومي وباكر والله اني ما اتخلى عنك .. يا اجمل ذكرياتي ................... 2- " المقبرة " .. فلان " اعطاك عمره " وانتهت لذة ، وطاح جدار كذا " الموت " يتغافلنا .. بدون اصبر ودون شوي ثلاث ارباع من " حزنك " .. ذهول وخوف و استفسار لو انّ الميت اللي مات " أنا " ؟ " زوّادتي " وش هي ؟ صلاة و مصحف و سجاده و تسبيح و استغفار ؟ أو اني رايح ادراج الظلام .. وطامعٍ بـ الضي ؟ لذلك لملم اوراق " الأمان " ، وقول : يا غفار ترى " انفاسك " بسيطه .. ممكن توقف بشرقة مي تحرر من عبودية هواك ، وضد " الاستعمار " وقاوم لعبة " الشيطان " اذا ما زّين " اللاشي " واذا منك لمحته فـ " الضمير " ارمه بسبع حجار تراه " مراوغ " ويمكن يمرر شي .. يبغى شي وحاول تفهم ان " العمر " رحلة / راجعين الدار وذا عابر سبيل , و هذي الشجرة , و هذا الفي ماهي " فانتازيا " , واقع .. وذي جنه و هذي نار مصيرك في يديك ، اخذ الطريق الصح ، ولا عيّ مثل ما عيّت " الفكرة " على اوراقي .. بدون اختار وسور " المقبرة " .. حاصر تفاصيلي وفك يدي قبور " الراحلين " الصامته ، تغريبة الأسرار ضجيج الأسئلة خلف الضلوع ، وتمتمات الطي مُهيب " الموت " ، مجهولٍ نعرفه .. واحتمالٍ صار حياة اخرى ، والى " مالا نهايه " .. بس ماهي هي صدى صوت " الكلام / الصمت " موتٍ ماعليه غبار خشوع ، وهمهمه ، وثياب بين المغفرة و الغي من خيوط الكفن .. خيطٍ يمر النعش و المسمار ويخنق حنجرة غالي .. فقد غالي ، ويذرف كي يمر النعش ، وتقول العصافير : " انتهى المشوار " و تلقى الحي ميت خوف / تحت "الميت " اللي حي تهيل يدينك " تراب " المواجع ، و الدموع اعذار على وجهٍ تحشْمه .. مالقى بين الخلايق " زي " هنا توقف عقارب " ساعة / الدنيا " بدون جدار وتستوعب يقين .. إن الحياة بكبرها " لا شي " ................... 3- مسافات الرحيل تجعّد " الفلاح " طيب ، وتصدى يرعى كفوف النخل ، ويقاوم الطلح الارض هذي .. الشوك فيها المبدى ونفوس اهلها " مستلذه " على الجرح لا تتعب " الغيم " ، وتقول : اتحدى سوالف " البيدا " تكفي عن الشرح على كثر ماجاب " فكري " و ودّى ثقافة " التعتيم " ما تقبل الـ " صبح" لا يبست غصون الرجا .. لا تردّى وتهشم " الفيّه " وتشعل بها " الملح " سيّل " مسافات / الرحيل " ، وتعدّى وخل " الكلام " يباري الشرّد الوضح ................ 4- واقع موازي القصيدة .. لابسه عقدٍ من اللولو " مجازي " كل ما يلمع .. تطل الشمس , وتبان الحقيقه واجهتني .. لابسه ثوبٍ من خيوط التعازي تبتسم لي حزن ، وتراقص لياليها العتيقه راودتني عن " ثمار / الصمت " في واقع موازي ودها تلقى " طريق " يردني باية " طريقة " تعرفين انك على راسي و فخري واعتزازي وصوتك حباله " معاليقي " ، وهسماتك رقيقه بس والله ما معايه وقت .. يسمح بـ " ابتزازي " منشغل فالعمر ادور لي على ضحكة " عميقه " ويش جابك ؟ والمطيه برق ، والفارس حجازي يحارب " الاعصار " في رشفة سحاب تبل ريقه طاحت عيونه من " عيونه " ورى غبار المغازي ويتسابق في نسم صدره .. زفيره مع شهيقه ويش جابك ؟ والمدى مخنوق ، والصبح انتهازي و" السوالف " .. تشعل الدنيا على الدنيا حريقه فارسك .. عاف القنص والبندقيه و الجوازي يوم شاف " المسك " ماهو مسك .. بعيون الخليقه حطّب اشجاره ، وسوى للخشب خطٍ موازي يرسم مْن الريح " روح " ، ومن هواجيسه " حديقه " .................... 5- شمعدان الما صاحبي : والارض مشتاقه لـ ريحة زعفراني بخّر ثياب السما الزرقا ، قصيد و حبهانه دلة الشاعر" أدب " يغلي على جمر المعاني سوق " فنجالٍ " .. يفوح افكار ، ويحرر أمانه مال عرجون التمر " لذة " .. على عظمة لساني منفتح للخير " باب " ، ومنقفل للشر " خانه " كيف ما اسرج - للهوا و الشمس والطاله - حصاني و" المثايل " .. دوحة الاخلاق ، وبلاد الرزانه كل تسع شهور .. يولد " شاعر " ، وتختال " اغاني " وتنبت الساحه " مساحه " ، مالها فـ " الخيزرانه " شمعدان " الما " ، ونور البحتري و الاصفهاني وخلوةٍ .. بين العقل والقلب .. مليانه " ميانه " طاح في " بهو " الصدر صوت الذهب ، واحتل اذاني عملةٍ " صعبه " .. لها فالسوق وجهين ومكانه تاج الاخلاق ، وسمو النفس ، والنجم اليماني زينة العقل ، وبخور الهيبه ، وبشت التكانه الادب فالناس " مفتاح " القبول ، وقلب ثاني يلبس البردان " جبه " ، و الضعيّف " جبخانه " من بغى " والنعم " يتحرر من ثياب " الأناني " يطلق اسراب الكلام " الزين " ، ويجوّد حصانه يستميل الناس بين " الناس " و " السبع المثاني " با التواضع ، و المحبه ، والمروه ، و الامانه و" الادب " واسع ولو بـ اضيّقه وسط المحاني اسم " جامع " للقيم .. بين المراجل والديانه .................. 6- الجمرة النايمة .. دير" الرحى " ياشعر حتى يطير الغبار سنابل القمح .. في بيدا الضما هايمه صوت القصيده " حقيقي " لاصبح الثلج نار بـ اشعل قلم دفتري ، واوسّم السايمه الظلم ضد العدل ، والليل ضد النهار وحروب " الاضداد " في ظل " الأنا " قايمه تبقى " المفاهيم " لو وجه الزمان استدار اوضح من الشمس ، لو ان " الرؤى " غايمه الصورة " المايله " .. تشويه لاجمل جدار لو كان طوبه " ذهب " ، ذهب وهو لايمه يازارع الظلم ، وش تجني بذور الدمار ؟ الا غصون الندم ، والغبنة الحايمه لا تحسب " الارض " تشرب لذة الانتصار لا والله الا .. تحتها الجمرة النايمه ظلام .. يا حزن الارواح ، وأسى الانكسار سلام .. يالعدل ، والدنيا ماهي دايمه " الظلم " لا بد .. يسقط وجهه المستعار مثل سقوط " الاسد " من آخر القايمه من مابكى دمعة " الشام " ، ولظى الانهيار ؟ والفرحه " اطلال " وبطون " المدن " صايمه من ما نزف غبن و" السجان " يلعب قمار ؟ و" اصابعه " دم ، و " انفاسه " ماهي شايمه من طاول النوم جفنه ، والضماير دمار ؟ وذراع " الانسان " .. مفصوله عن القايمه .................. 7- رياح العمر سولفي لي يارياح " العمر" .. عن خف الاشده و" المسافه " نايده .. بين السحابه و الفيافي " القصيدة " زفرة الشاعر ، وتفكيره ، وسده اسهل الأشياء فيها .. الوزن وحروف القوافي و" الثقه " في النفس .. ماهي من سواليف المخده تنتزع من فم الايام ، وتجاريب المنافي و" التنافس " .. ميزة الناجح ، وبنزين المكده " والتهادم " .. جمرة النقص ، وطواحين الخوافي و" الكلام " مراية العقل ، ومفاتيح الموده قلته كثرة جراح ، وكثرته قلة تعافي و" الحوار " افكار تتلاقح ، ونضجٍ مايهده و" الجدال " اللي بليا فايده .. فارق ثقافي واختلاف الراي .. مايرضي النفوس المستبدة يمكنك تلبسك ملبوس " الردى " وانته سنافي من يعيد صياغة " الواقع " على وجهٍ نوده !! والسفينة تايهه فالبحر وتعاف " المرافي " ................. 8- تفاءل تفاءل .. وافتح لشمس " الاماني " صدرك المرتاب ترى " الدنيا " قصيرة و" العمر" مايحتمل يا خيّ تفاءل .. لا تخلي " الموت " هم ، وقدم الاسباب ترى ربك رحيم ، ورحمته أكبر من اكبر شي تفاءل .. لا تسيب " الحزن " يخلق للدموع اهداب ترى ابليس الرجيم يبرر الحزن اشتباه وغي تفاءل .. لا تدع لـ شعورك " السلبي " سما واسراب ترى " الافكار" بوصْلة الحياة ومعطيات الضي تفاءل .. لا انقفل قدام وجهك " باب " يُفتح باب ترى ما انته بميت جوع فالدنيا .. وربك حي تفاءل .. لافشلت بـ " تجربه " ، والتجربة جلباب ترى بعض " الفشل " نقطة تحول لو صبرت شوي تفاءل .. لا تشوف " الحاضر" اسود والقلق غلاب ترى الماضي دروس ، و بكره اجمل ، والسحابه مي تفاءل .. لا حرمك الله من شيٍ تبيه ، وغاب ترى لله " حكمه " لا عطى هذي وخلا ذي تفاءل .. لا لقيت الله " رزق " غيرك بدون حساب ترى اللي لك ماهو رايح لغيرك ، لا تقول : يدي تفاءل .. لا " كبرت " بعمرك شويه وشعرك شاب ترى " الاشجار" لا طالت بها الاعمار زادت " في " تفاءل .. لا تناوشك " المرض " مابين ضرس وناب ترى ربك يزيدك " مغفره " لا زدت " آه و أي " تفاءل .. لا اصبحت في عينك " الدنيا " شريعة غاب ترى ذا حالها من يوم خلقت .. بين حي و حي تفاءل .. لا بكت عينك وزاد " الظلم " فالاقراب ترى " حقك " يبا يوصلك وافي لو يزيد الكي تفاءل .. لا خذلك الواقع و غدروا بك " الاصحاب " ترى العالم خياراته كثيره ، لو كثيره سي تفاءل .. لا امتلى قلبك " محبه " مالقيت احباب ترى كل " القلوب " الصافيه تعطي ما تاخذ شي تفاءل .. والتفاؤل ميزه تميّز " أولي الألباب " ترى لو ما ترى .. ماانته بشايف في طريقك ضي ................... 9- البارودة من يلوم " الوقت " .. لا يشره على الشماعه ومن يزلّ " الصيد " .. لا يشره على الباروده احتمالات " السعادة " في رفوف " الباعه " و الحياه " مغامره " ، وعدودها " معدوده " ان بغيت تكون " لا عادي " تعدّ " الراعه " وانفض غبار " الجناحين " ، وتعدّ " السودة " كون ما ودك تكون بـ " مركبك " و شراعه انته " افكارك " ، و روحك " بيرك " المورده عيش فالدنيا ، ولا تنسى حساب الساعه واركل " اللاممكن " برجلك ، وشب " العوده " " الكفو " .. من يلمس غيوم السما بـ ذراعه و " الردي" .. ماهو بوارث طيبه مْن جدوده عيش في عينك " ملك " راضي بكل اطباعه والجواهر في طرف " تاجه " غناه و جوده كون " متوازن " ، ودوس افكارك الخداعه " الرضا " ماهو نقيض " احلامك " المطروده طع " نواميس / الحياة " ، ومن يجيد الطاعه يقدر يخلي " الأنين " المستبدّ .. " انشودة " لا تجي تحت " المطر " .. وتولع " الولاعه " ولا تخلي " الريح " تجني مْن الغصن عنقوده لا تحاقر " حي " و تغيّب ثلاث ارباعه اجود انواع الحرير " الحر" .. صنع الدوده وغير من غيرك و" نافس" والفتى بذراعه اكثر اسباب النجاح " الغيرة / المحموده " وقاوم شعور " الحسد " لا يحرقك باوجاعه لنك اول من يطيح .. بناره " الموقوده " وان فقدت " الطيب " ليله حاول استرجاعه يحضر الطيب و يغيب .. وماتدوم وعوده ولا تكبّر وانت ابن " 9 " ، وعمرك ساعه " التكبر " .. ما يغطي القيمه المفقوده ولا تبرر ، كثرة " التبرير" راس اصباعه يتجه .. عكس اتجاه النيه " المقصوده " ولا تجادل .. من يدور لـ " الخطا " شماعه يتهمك بـ " تهمته " ، و يقيدك بـ " قيوده " وان تضايقت ارحل بـ " صمت " وبدون وداعه الحياه بكبرها .. رحلة " ذهاب / وعوده " ولا تثق فـ " الحب " وتصدق كلام جياعه المحبه " قيّمه " .. لكن ماهي موجوده ................. 10- " العراق / العظيم " .. ياقصر " ابو جعفر المنصور " بابك يتيم واسوارك اشباح ، وقلوب الظبا ذايره يا وجد حالي على حال " العراق / العظيم " وانا " سعودي " واشوف جراحه " الغايره " تاريخ ، و عقول " جباره " ، وشعبٍ " كريم " لكنّ كسرت يديه .. الشلة " البايره " يوم اتنفس شذى " التاريخ " قلبي يهيم ودموع عيني .. الفرات و دجله الحايره كان " الشموخ " يتباهى بدربه المستقيم واصبح مُحاصر " ردى " في داخل الدايره كان .. الادب و الثقافه والذرى و النسيم واصبح من " الجهل " يغسل ركبة الزايره كان .. السمو و المهابه والقرار الحكيم واصبح " تبع " ، ما تثورعروقه الفايره تمكّن " الفرس " .. والدوله هواها سقيم و " الخير " ودّع هله .. في سلم الطايره هدية الابن " بوش " الى " الخميني / الرجيم " على طبق من " ذهب " واستوطن السايره يكرم هل " السنه " اصحاب النضال القديم حكام " ثلثين / الارض " ، وشمسها النايره المشكلة فـ " المطايا " .. والضميرالعقيم اللي على دين " مشبوه " ورؤى " جايره " و" الدين " .. شركي و شهواني وحول الحريم متعه ، وشتم ، وسوالف ماهي بـ صايره ياليت " صدام " يرجع ، والعوج يستقيم و" عقل / العروبه " تطيب جراحه الغايره ................. 11- " حالة / ملل " .. ترجلت عن " صهوة / الصمت " المشاريه مشتاقه .. لـ فنجال قهوة من " جراحي " في دلتي " حبرٍ " يقنّد راس قاريه وان فاح .. مافاحت معه ريحة صباحي اعيش في حالة " ملل " مليت اداريه لا اوراقي اوراقي ، ولا رياحي رياحي أنا أنا ، لكنّ " انا " مااعرف مواريه خطوه على " غيي " و خطوه في " صلاحي " مرّ العمر " برق " ، ورعود " الما " تباريه ونجحت حتى صرت اعاني من " نجاحي " ياليتني " طفل " يتمرجح فـ : المداريه و العب مع الريح ، و يطيّرني جناحي ماهو " الهروب " مْن الزمان ومن شباريه لكنه " الشوق " .. لـ هدوئي و ارتياحي هجيت من درب " الغرام " ومن ضواريه " الوادي " .. اللي سال من دم الاضاحي واقفلت بابٍ لـ "الصداقه " .. في ذواريه جذع النخل .. يلعن سواليف " المساحي " وانا كذا .. من " باعني " مانيب شاريه لو كان نور بـ ليلي ، وشمس بـ صباحي اكون " وحدي " فالظلام وفي مساريه اهون ، ولا اعوّل على قرن " الوضاحي " ماني على خبري ، وصرت " القلب " اواريه و " جديّتي " .. مستثقله ضحكة مزاحي حتى ماعاد " اهتم " للي كنت اداريه ورضا " عبيدالله " مثل ضيقة " مناحي " قساني " الوقت " وعطيت القوس باريه وهانت هقاويّه ، ولا هانت رماحي روّح زمان " الطيبين " وطاب طاريه " غريب " .. في هذا الزمان الانفتاحي " الوقت " متغير ، وانا مزري لا اجاريه مسجون فـ " الماضي " يا من يطلق سراحي ؟ الشارع " الموزون " غارق في عباريه تمكنت خطة " عدوي " في اجتياحي حتى " الشجر" كثرت على اغصاني قماريه واخاف اصايدها ، وانا سلاحي سلاحي بين .. الهوى ، و النار ، والعمر وطواريه محاصر بـ " لا شيء " من كل النواحي تقدر تقول اني على كثر " المشاريه " " عاقل " ولكن في زمن ماهوب صاحي ................. 12- المال : بين الغنى و الفقر .. " صوت / الشعر " ما ضيّع صداه و مسافة " التعبير " .. ما تحتاج الى منفذ " هروب " المال : راس المال فـ " العالم " ، و ربان الحياه يلوي " رقابٍ " ماتلوّى ضعف ، ويميّل " قلوب " ياهو مسوي شي فـ " الدنيا " .. على كل اتجاه من همسة الاحباب للاحباب ، الى صوت الحروب حبه من " الفطره " .. وسحره فالملوك و فالرعاه ويعلّي اعلام الدول ، و يحقق احلام الشعوب مهم جداً .. كثر ما يتحسس " الاعمى " عصاه حقير جداً .. كثر مايترصد " الحاسد " عيوب من كثر ما يثرعلى " الانفس " ، ويعمينا هواه يخلي الطيب ردي ، ويخلي الصادق كذوب ياكثر .. ما غبّر ثياب الطيب ، و بشوت الدعاه و ياكثر مازين قبيح " الوجه " في عين اللعوب ان قلّ .. يفقدك " الأمان " ، ويحرمك لذة ذراه ويقصّر ثياب " المراجل " عنك ، وتزلّ " الوجوب " وان زاد .. خلى منك " متكبر " ، وقلبك من " حصاه " وفك الك بيبان " الخفافيش " ، وممرات " الذنوب " ياحظ من يقدر يشوفه " صح " بعيون " الصلاه " بعيد عن مشهاة " الارواح ، ومشاريه " الجيوب " ................... 13- قسورة .. سوالف "الريح " عن ريح الغلا ..في مداي تنبت للاشجار ظل ، و للورق حنجرة تطرب " سموع " القصايد .. لا ترنم غلاي والغيم برقه ، و رعده داخل المحبرة بأناملي .. ريشة غروري ، ولمسة هداي تسيّل شعوري .. وتنبت سنابل ذره تزاحم الصدر " موطن " شاربٍ من رضاي مايروي احساس رجلٍ .. عاشقٍ له مره هذي " بلادي " .. سمو الفاتنه في سماي تعيد .. ليلى و قيس و عبلة و عنتره حبيبها " فارسٍ " عاسف قريحة ثناي شرى لها .. ثوب ريش ، وخاتم ، وبنجره قال : ارقصي في قلوب الناس وانتي مناي والارض ميدان مجدك ، والسما منظره انتي الاميرة ، وانا اميرٍ على مستواي ماارضى بـ " عصفور " في يدّي ، وفيه شجره انتي جميلة ، ولكن صرتي اجمل معاي واللي خلقني لاخلي " طلتك " مبهره وشلون مااغليك ؟ وانتي قطعة من هواي و" جسدك " تاريخ ، و " ترابك " جمر مبخرة " خالك "على وجهك الكعبة ، و "طيبك " دعاي و" سبابتك " مئذنة راهب على منبرة مهد " النبي " الأبي .. خاتم جميع انبياي مغن " الآساد " من بعثته الى مهجره كم سولفت غزوة ؟ وكم مجد ملى يداي ؟ والفرس والروم .. من سيفي ليا المقبرة حكمت ثلثين الارض ، وكل حي بذراي والغرب والشرق .. ماهزوا براسي شعره والشعر شاهد على العصر ، ومداده غناي من امرؤ القيس .. الى لامية الشنفره تطاول " الوقت " والمكتوب رايح وجاي وتناثرت " سبحة / المجد " ونسينا اكثره الين جاها " معزي " قال : ابقطع ضماي وحرر يدين "الصبية " من يدين انقره واليوم .. في ظل ابو فهد ياديرة وفاي تدللي ، واتركي الباقي على " قسورة " من قسورة ؟ غير راعي مرحباي وهلاي اللي كثر مايسوي .. قلت : يا مااكثره " عراب / الامجاد " من قال السوالف وراي والفعل قدام عيني ، والسحاب اقدره ................. 14- مظاهرات .. " مظاهرات " الشوارع .. ظاهرة / صوت تنفيس " صادق " عن الضيق وعن الكبت ماالومهم و" الكرامه " وسط " تابوت " لكنّ ياللي رفعت " الصوت " وش جبت ؟ لا وقّفت نزف " جرح " ولا اوقفت " موت " ماتشبه الا " مطر " ماهو على " النبت " و احيان .. " ثورة / جياع " ولابسه " كوت " واحيان .. " ترويج " لـ الطاغوت و الجبت واحيان .. " تمثيل " واستعراض ممقوت يعنني انا " القوي " يوم انك ارتبت حنا " سيوف / الجزيره " روس و بشوت و قبل مانفعل " نفكر " .. لا تعربت النصر له " معطيات " و يوم مثبوت يبشر بـ " يوم / الاحد " من قدم السبت ................ 15- براغماتي قال " القلم " : سلام ، قلت : انت اش تبي ؟ قال : اعطني من " دفتر / الشعر " ورقه قلت : امتلى من حبر همي و تعبي واعطيته .. لكف المعاذير " صدقه " قال : الشعر ؟ قلت : الشعر فارس أبي " صديقي " .. اللي لا كذبت اصدّقه الوافي اللي قال : في سد شنبي يوم ان كلٍ مر " طيبي " وسرقه لكنّ مليته ، وهو ملّ " يحبي " يتبع .. ضياع " احلامي "المتحققه قال : الحبر ؟ قلت : الحبر " دمٍ " غبي على " ذكائه " .. ما بنى جسر الثقه قال : السبب ؟ قلت : السب في كوكبي يعلق " إلهامه " بـ حبل المشنقه " براغماتي " .. كثر مايعطي يبي والقصر يُهدم ، و البقا للـ " الصندقه " قالوا لي ان " المسك " من دم الظبي والظبي .. في صدري ومزري لا الحقه قال : اختنقت ، وقلت : ماهو بسببي وش قرّبك لـ " جراحي " المتفرقه ! وشلون تجمعني وانا راس " عربي " ثاره مع " الريح " .. ومضيع " بندقه " لو كنت " واحد " كان يسهل مطلبي لكني " اسراب / الطيور " المطلقه انا شباب و شايب و طفل و صبي و " روحي " على الأربع جهات معلّقه العب مع ظلالي .. وصدري ملعبي حتى لو ان " الشمس " ماهي مشرقه ياذا " القلم " .. انا ضحية " مذهبي " درعي ورى الجيش ، وسيوفي مرهقه رح هل دمعك فـ " البحر " كانك تبي ماعاد لك في " دفتر " الشعر ورقه .............. 16- فلسطين لا احد يزايد علينا في " فلسطين " الارض فـ ارواحنا ، والشعب اهلنا مشاهد " الموت " ماتبكي لها العين يبكي لها " القلب " ، وتسهّر زعلنا اخوان مهما حدث ,, فالدم و الدين و من يقتل " اخواننا " .. كنه قتلنا لكن " حماس " الأبية رايحه وين ؟ تخليط " الاوراق " منها ما جهلنا تلعب مع " ابليس " في دم المساكين وترمي حجار القضيه في " جملنا " يااهل العفل في مفاهيم " الموازين " نحتاج حاجات واجد .. قبل " املنا " العاطفه .. ماهي " سلاح " الميادين وإعلام نقل الخبر .. ماهو " بطلنا " مقومات النصر في حرب " حطين " لو انها في " يدينا " ما فشلنا .............. 17- ماجد عبدالله .. " ماجد " ويضحك لي البرواز والصورة و" الابتسامه " .. تلون كل جدراني من شرفة " الذكريات " اشوف جمهوره واهدافه اللي مسجلها على " احزاني " " ماجد " وماهو مجرد " لاعب / الكوره " " قيمة " لها ابعاد .. مثل البعد الانساني ايقونة " بلاد " وابداعات منثوره والقاصي يقولها .. للداني الداني ياما رفع راية " التوحيد " منصوره والشعب ردد معاه : الاخضر " ألواني " لو كان موجود في مباراة " ...... " ما راح يضحك علينا الشعب الالماني " ارقامه " الين هذا اليوم .. محظوره من يقدر يحطم ارقامه ؟ و يلقاني ومبارياته " قصايد " تحكي شعوره صح الله ابداعه ، وصح الله لساني واهدافه " الحان " مثل الحان " ابو نوره " لا قال - رافع يده - هذا من " الحاني " ياكثر ما اعطى وخلى الناس مسوروه وياكثر مازوّد " الفرحه " وبكاني عشقت نادي " النصر " من ريحة زهوره واهدافه " معلقه " في كل وجداني تقادم " الوقت " وحضوره هو حضوره والسر يكمن وراء " الجانب / الثاني " يبقى بعين الضمير المنصف " اسطوره " لا " كريستيانو " حجب نوره ، ولا " ماني " ................. 18- مات الشغف .. هل غادر َالشعراءُ من متردّمٍ ؟ يا " عنتره " ولا ّبقى ؟ ما يغري اقلام الهجوس " العاويه " على ضواحي قرية " الحطاب " فيّه و شجْره سرح بها في حزمة " الخذلان " واضحت كاويه والارض ماهي بكر ، والاشواك تسعه وعشره وجُرّة " مسافر " لونها حمرا ، ونفسه قاويه يبعد عن " اضواء " المدينه .. بعد نومه وسهره من يوم ظلى يزرع " البيدا " ، وبيره طاويه مظلة " الصبر " اهترت ، شمس و مسافه و غبره بين الرحيل اللانهائي ، و الهموم الثاويه وقطيع " الافكار" .. ارهق الراعي و قطّع دفتره والناي صوته فاح ، واغصان التفاؤل ذاويه لا عين " عبله " صابت الخافق و سالت ثرثره ولا اخر الدرب المسوّر ليل .. " شمعه " ضاويه كئيب هذا " الإنطفاء " اللي يزيدك " بعثره " حزين ، منظر شوفتك .. لنجومك المتهاويه الآمنا .. كأنها قطعة " ضماد " معطره واحلامنا .. كأنها " أعجاز " نخل خاوية مات الشغف ؟ ، ولّا يقاوم خانقه فالمقبره ؟ والابتسامه .. سارحه بثوب الحداد وضاويه ضاع الأمل ؟ ولاّ طريق الذنب يم المغفره ؟ لا سال لون " الليل " فالصبح وغدت متساويه ياريش " طيرٍ " زارعه .. على ضفاف المحبره اناملي نار ، وفمي صرخه ، وعيني راويه ان كان باقي من حجار " عداي " فالعذق ثمره عطنيه في نكهة " تمر / هندي " ، ورشفه غاويه خذني .. الى اللاوعي الى اللاوقت الى اللامعذره ملّيت اروم " القمه " العليا و اخاف " الهاويه " عطني زوايا " الدايره " كذبه ، لا جات المسطره ترسم مساحاتي " الكلامية " .. بنفس الزاويه نفس " الوجيه " العابره .. داخل حدود المنظره نفس " الثياب " الفارغه قيمه ، ونفس الحاويه نفس " الشعور " .. اللي ترمد شعر فوق المبخره نفس " الحياه " اللي تواعدني ,, ولا هي ناويه محتاج شاعر .. يقتل " الشاعر" ويسرق دفتره ويرجع " الانسان " هاوي ، و القصيده هاويه .................. 19- طاولة نرد ورى " جدار / الصمت " .. ماينبت الورد وشلون ينبت ؟ و " المطر " ما يمرّه سولف معي .. عن قصة النار و البرد عن سيل " الانفاس " و هروب " الازره " اهطل " محبه " ، والثرى يشرب السرد جاوز بـ " آهاتك " حدود المجره ويش " الغياب " ؟ الا رصاصه من الفرد ويش " الهوى " ؟ الا زفرتين و مسره ودي بك ، وماني متعوّد على " الطرد " اغليك .. لكن دون حد " المضره " اغنم " وجودي " قبل ما افعّل الجرد وماعاد تلقى لي على الارض " جُره " حياتنا هذي ماهي " طاولة / نرد " نرمي عليها قلوبنا .. ونتشره ................ 20- شاعر سعودي قدر الله عليّ و صرت " شاعر / سعودي " يعسف " الغيم " ويهلّ " الحروف " الفصيحه فـ " الصحاري " .. عرَق شمسي ، وجرّة جهودي وفـ " المدينه " .. قصر شاهق ، وروضه فسيحه و" المساكين " لا زالوا على اوّل عهودي يحذفون " النخَل " ، و يسممون " المنيحه " يا وجودي ليا من قلت لك : يا وجودي وجد من يحسْب الشعر فـ " لسان / الذبيحه " كيف بالله يا " سيفي " تحارب " عضودي " ؟ وانتصاري على نفسي .. " هزيمه " صريحه ياكثر ما اشرب " الضيقه " وامثل جمودي واتعمّد " هروبي " .. في عيون المليحه طاول " الصمت " براقي و حاصر رعودي وارتوى " الصبر " من دمي .. وهو يستبيحه ليش يا ثوبي " المشقوق " تشعل زنودي ؟ وانت " ثوبي " .. وميزان الستر و الفضيحه كل ما احاول القى " عذر " يذبح شهودي طاح " رجال " من عيني ، وطوّل " مطيحه " والله ان " الحياه " .. اشبه بلحية " يهودي " زايفه ، لو تبللها " الدموع " النضيحه قصتي .. سلّم المجد و خطاوي صعودي وضيقة " الصدر " من ضوّي ، ودنيا قبيحه ان تفاخرت .. ذا " بنكي " ، وهذي " نقودي " ليش للغبن " مارّيه " ، و للغلّ " ريحه " !! ما تناقصت .. غير اللي دخل في حدودي يهدم " الصبح " من غبنه ، و كفه شحيحه يا قصيدي " صديقي " هات باقة ورودي واشرب " الكيف " من كفي ، وهز " القريحه " ما تجفف عيون الشعر .. " عين " الحسودي و ماتقطّع عروق المجد .. " شلفا " جريحه بيض الله وجهي .. كل ما فاح " عودي " وسود الله وجه .. اهل القلوب " القبيحه " مارفعني " لقب " فارغ ، ومثبت وجودي فالعقول " النظاف " ، وفالقلوب " الصحيحه " وماتعلمت " اهايط " و اتعدى حدودي و " ابتعادي " .. ضريبة نفسي المستريحه طبلي يا طبول الحقد ...عند " الحقودي " و غن يا " بو مساعد " ، و ارقصي يا " مديحه " غاسل ايدي من " الدنيا " ، ومالي " عدودي " بالثقه ، والمراجل ، والطباع " الرجيحه " عيش يا " راسي " بخير ، وتمالك صمودي و فدوة " رجولك " .. المتردية و النطيحه ................. 21- رغيف الكلام يا للاسف " خاطري " .. ماهو على مايرام حاولت ، و" محاولاتي " فيك .. ضاعت سُدى اهديت لك من حروف " البال " عقد و زمام ونسيت نفسك ، وانا " الفاعل " وانا " المبتدا " ياهيه .. طول " الجفا " يبّس " رغيف / الكلام " لين انجرح " صوت / الاحساس " و تهاوى " الصدى " آخر " حديث " .. اجوف ، وخالي من الاهتمام و خالي من .. العطر ، والنشوه ، وقطر الندى " أغراب " نلبس على الغربه ثياب " الغرام " ؟ يلمّنا " غي " متمرد ، وغفوة مدى غموضك " المستفز " .. انهك وضوح السلام وانته على " الحرب " متشفق .. و كنّا عِدا وجفافك .. اسقط من " الفيه " حنين " الحمام " وغيابك .. اثبت لي ان " الشوق " ماله جدى وردودك " البارده " .. مازودتني " هيام " ما زادتك في عيوني غير .. موت و ردى لا يمكن يطول عمر " الحب " .. دون " احترام " عسى المحبه تحت رجل " الكرامه " .. فدا ................... 22- أهلين .. العيد هذا العام " " .. ياهيه عيدين عيد رمضان ، وعيد شوفة غلايه يا الحلوه .. اللي " طلتك " تملي العين وتذوّق " الاوراق " طعم " الكنايه " بالله قولي .. ماخذتني على وين ؟ وفستانك " الليل " ، و خيوطه " غوايه " واناملك تعزف " حريرك " ، وانا بين غيبوبة احساسي ، و صحوة منايه تنافسوا " قلبك " و " وجهك " على الزين كلٍ يقول : الزين عندي .. حكايه وانا حسن حظي .. جمعني بـ " الاثنين " الوجه / آيه ، و المعاليق / آيه قد قلت لك : أهلاُ ، وذا الحينه : " اهلين " قوسين تثبت لك " حديث / البدايه " ( ياليل ياجامع على الود قلبين ) اسكت ، وخل السالفه لـ " المرايه " نجلك " مناجم / كحل " ، والورد خدين وسيفك .. مثل سيفٍ يهابه عدايه والرمش " ريشه " ، والحواجب " جناحين " والثغر " جمره " ، و الملامح " سمايه " كنت احسبك " قصة / قصيره " و بعدين تعملقت فيني .. وصارت " روايه " ............... 23- الذنب و المغفرة كم " المسافه " ؟ مابين الذنب و المغفره و العبد مخلوق من " صلصال " ، والله " غفور " تتشكل " النفس " .. بين العقل و البعثره مابين لحظه " ظلاميه " ، و مصباح " نور " احيان الانسان .. مايذكر سوى " المقبره " واحيان .. ينسى " العمر " كله بلحظة سرور لو ان " الانسان " خطواته على " المسطره " ما كانت " الدايره " حول الحنايا تدور ماشي على " الدرب " ، والاوراق و المحبره افكار تملى " الفراغات " ، وشظايا " شعور " ان ضاق صدره .. يمدّ " الكسر " للمبخره ويبخر ثياب " الاحلام " ، و ثياب " الحضور " فـ " الواقع " المر ، لا عبله و لا عنتره ماغير " شاعر " لقى فـ " الشعر " .. نقطة عبور .................... 24- مساعد و نايف كيف صار مساعد " مساعد " ؟ و نايف صار " نايف " ؟ لوّ ماسلوا سيوف " الصدق " في وجه السحابه " الشعر " .. بوابة الروح ، وتفاصيل الولايف اكتب " شعورك " .. ولا تخشى مقصات الرقابه دام ماانت مسويٍ حاجه " غريبه ".. ليش خايف ؟ اطلق " طيور " القصيد العذب من قوس " الربابه " اكسر " قيود " الجفاف الاجتماعي ، وانت شايف وعيش مابين " العصافير " الجميله ، و " الذيابه " كون نفسك ، وانثر " الشاعر " على بيض الصحايف وكون غامض ، بس واضح في تفاصيل " الغلابه " " الله الله " .. شجرةٍ فـ الصدر ، تثمر فـ الشفايف ضيقةٍ في " بال " شاعرها ، تحررها " الرحابه " لا يهمك من " يهمهم " حيف ، ويسوق الكلايف لو يذوق " جراحك " اللي فيك .. ما ذم الكتابه كم " نصوحٍ " !! يهدي " الورده " على حد الرهايف لو بيدّه .. يسرق " الفرحه " ويسقيك " الكآبه " .................... 25- على الرف " النهر " .. وقف مداده ، والمدى جف لا تحرمين " العطاشى " لذة الماي من " جنة / الصدر " .. مدي للورق كف يا " شيخة " .. الزين ، والاحساس ، والراي في " طلتك " من يلوم العاقل ان خف !! وانتي بكت لك " سعادة " ، وابتسم " ناي " " الثغر " لا من حكى ، و" الرمش " لا رف يتعثر " العقل " في نزوة نواياي يا الجادل " الفارقه " ، ياالخاطر " العف " يا نكهة .. الحبر ، والدخان ، والشاي مدي يدك .. للـ " الكتاب " اللي على الرف واقري " فصول " الهوى والشوق وياي مالي بغيرك " هوى " صافي ، ولا شف يا " حلمي " اللي مضى ، يا "عمري" الجاي ..................

فيديو كليب : شيلة / ياليت الأيام

من الجميل أن يعيش الشاعر قصيدته بكل تفاصيلها ، ومن الأجمل أن يعيش فيها .. مقتطفات من فيديو كليب " التذاكر " ... آثرت أن لا أنزّل الفيديو كاملاً لعدة أسباب جوهرية🙂😵 ..

قريباً شطحة من شطحاتي 🙃🙂