عـاصم

المدربين نوعين: مدرب يصنع نجاح مستدام لسنين، ومدرب يبدأ بموسم ممتاز وينهار في الثاني. في الموسم الثاني، تكون الفرق المنافسة أخذت عيّنة كافية لتحليل مشاكل الفريق التكتيكية وهنا يظهر الفرق. مدرب المدى الطويل (مثل فيرغسون، غوارديولا، كلوب) يطور أساليبه بحيث يعالج نقاط الضعف المكشوفه، ويلعب على نقاط ضغف خصمه ويحجم نقاط قوته. بينما مدرب المدى القصير حلوله محدودة، وبعد ما تنكشف أوراقه نادر يبتكر حلول، ولعل أبرز مثال جيسوس.. مدرب ممتاز جداً، لكن عشان ينجح لازم يدرب فريق مختلف كل موسم أو موسمين عشان تختلف مشاكله مع اختلاف اللاعبين. في الهلال، وصلنا لنقط إنهيار كثيره آخر ٦ مواسم.. مع رازفان كدنا نخسر الدوري لولا ان منافسنا كان الشباب، ومع دياز خسرنا آسيا والدوري، ومع جيسوس خسرنا كل شيء. الهلال وأكثر الأندية السعودية معتمدة على نموذج النجاح المؤقت، لكن حالياً فيه أندية تعمل على نجاح مستدام وعمل تراكمي، فإذا وصلت لنقطة إنهيار في الأغلب بتخسر كل شيء، وممكن تخسر حتى هيمنتك. في الهلال، لا يوجد مدرب في العالم ما بيطالب الجمهور باقالته في ثاني موسم، ولا اتذكر اخر مدرب اجمع عليه الجمهور موسمين كاملين، بشكل رئيسي بسبب معايير النادي ولأننا تعودنا على الإقالة كحل سهل. الهلال قدامه خيارين، يختار نموذج ليفربول كلوب وسيتي غوارديولا وباريس إنريكي، أو نموذج تشيلسي.