من الخاص 📩 البنك اتصل علي وعرض يعيد جدولة تمويلي الشخصي عشان ينخفض القسط القسط الحالي 2750 ريال وباقي على التمويل سنتين و8 شهور العرض الجديد يخفض القسط إلى 1650 لكن يمدد السداد لخمس سنوات أنا متزوج وعندي طفلين ومصاريفنا زادت بشكل كبير الفترة الأخيرة زوجتي تقول خلنا نرتاح من ضغط الأقساط حتى لو طولت المدة وأنا خايف أفرح بانخفاض القسط وأكتشف إني دفعت مبلغ أكبر بالنهاية

من الخاص 📩 قبل أسبوع اكتشفت إن زوجي مخبي عني قرض أخذه قبل ثلاث سنوات مو المشكلة إنه أخذ قرض المشكلة إني طول هالسنوات أحسب إن ظروفنا المالية صعبة بسبب مصاريف البيت زوجي موظف وراتبه 16200 ريال وعندنا أربعة أطفال ونسكن بشقة إيجارها 36 ألف بالسنة من بداية زواجنا وهو يعطيني مبلغ محدد للمقاضي ومصاريف العيال وإذا طلبت زيادة يقول اصبري علي هالشهر عندي التزامات أنا موظفة وراتبي 8300 ريال وصرت أدفع من راتبي ملابس الأطفال ورسوم الحضانات وبعض الفواتير كنت مقتنعة إننا نمر بظروف مؤقتة وإنه فعلًا مضغوط لكن قبل أسبوع كنت أساعده يرتب أوراقه وشفت كشف تمويل شخصي بقيمة 225 ألف ريال سألته عن القرض وقال أخذه عشان يساعد أخوه يفتح مؤسسة مقاولات قلت له طيب ليش ما قلت لي قال لأن الموضوع بيني وبين أخوي وما حبيت أشغلك فيه سألته هل أخوك يسدد لك شيء من الأقساط قال لا المؤسسة خسرت وهو للحين يحاول يوقف على رجوله قلت له يعني ثلاث سنوات وأنا أشاركك بالمصاريف وأنت تسدد قرض أخذته عشان مشروع أخوك قال أنا ما أجبرتك تدفعين شيء وكل اللي سويتيه كان بموافقتك قلت له صحيح لكن موافقتي كانت على أساس إنك محتاج لمصاريف بيتنا مو إنك ملتزم بدين شخص ثاني رد وقال لو رجع فيني الوقت بسوي نفس الشيء لأن أخوي كان محتاجني أنا ما أعترض إنه يساعد أخوه لكن هل من العدل يخفي عني التزام بهالحجم وهو يأثر على مصاريفنا ومستقبل أطفالنا واللي محيرني أكثر إنه للحين مقتنع إنه ما غلط بشيء

من الخاص 📩 أشتغل بالرياض وراتبي 11650 وأهلي بالقصيم أصرف شهريًا 2800 بين سكن ومشاوير جاني نقل قريب من أهلي لكن راتبي بينقص 2400 شرايكم .. المبلغ يستاهل ولا عادي ؟

من الخاص 📩 أنا مصور ومخرج أمتلك استديو معدل دخلي الشهري من 30 إلى 50 ألف حسب الموسم العمر 25 ومقبل على زواج ان شاء الله مجموع المدخرات 700 ألف وأحتاج المشورة فيها

من الخاص 📩 أنا متزوج وعندي 4 أطفال وراتبي 16400 أفكر أتزوج ثانية وتكاليف الزواج قرابة 110 آلاف لان الاولى عوبا وماتسمع الكلام وغثيثه الصدق بخليها تبلش بالعيال بس عندي قسط عقاري 3900 ومصاريف أسرتي 6500 شرايكم اقدر اتزوج تشوفون ولا انتظر لين يضبط وضعي؟؟؟

من الخاص 📩 السلام عليكم ، استفسار اذا احد يقدر يفيدني ، صار علي حادث ومعي تأمين شامل والغلط على اللي صدمني 100% وليس معه تأمين . تكلفة الاصلاح تقريباً 15,000 ريال بسبب ضروفه بنتفق على انه يدفع 9,000 والباقي انا بتحمله . في الحاله هذي هل بكون هناك ضرر علي من البنك او اي شي بحكم ان السيارة عن طريق البنك دفعتين .

من الخاص 📩 السلام عليكم انا مهندس كهربائي وراتبي ٥٦ الف في احد الهيئات الحكومية خبرتي ١٠ سنوات وبلغ عمري ٣٢ وللحين ماتزوجت تخوفًا من التكاليف الجانبية اللي تجي مع الزواج لأني اشوف رانبي مايغطي كامل التكاليف والمصاويف بعد الزواج خصوصًا اني اصرف على عيال اختي بحكم ان ابوهم متوفي ابي حل

من الخاص 📩 السلام عليكم أنا بنت و أبوي فتح سجل تجاري و مؤسسة بأسمي من يوم عمري صار ١٨ يعني تقريبا اول ما دخلت الجامعة .. و مشكلتي هي ان لي سنة و نص اكلم ابوي ينقل المؤسسة او يقفلها لأني خلاص بتخرج و ببدأ اشوف حياتي المهنية و الحين تخرجت صار لي سنة.. الي صار تراكمت عليه الديون و حاليا جاني تنفيذ بأسمي بسبب المؤسسة و خدماتي واقفة ب ١٠٠ ألف لأنه ما كان يدفع الضرايب و الزكاة و هذي الأمور… وش المفروض اسوي الحين؟ نفسي اتوظف بس أنا عايشة في قرية و أغلب الوظايف المتاحة تكون حكومية و لازم عن طريق تمهير، و شرط تمهير ان ما يكون عندي سجل تجاري… أنا والله أحب ابوي بس هو واقف بطريقي … للعلم ما قد صرف و حتى يوم فتح المؤسسة برضو ما عطاني فلوس و أنا مسامحته بس احس خلاص ابا المؤسسة و ديونها تبعد عني عشان أنا أشوف حياتي و وظيفتي. ايش الحل لو سمحتوا

من الخاص 📩 بنتي عمرها 24 وتوظفت براتب 6800 ساكنة عندي وما عليها إيجار ولا فواتير طلبت منها تساهم بـ 1000 شهرياً بمصاريف البيت وزعلت أنا غلطان بطلبتي ولا المفروض تتحمل شوي من المسؤولية وتساعدني بمصاريف البيت والعيال لانها كثرت الصدق وانا ما اقدر عليها والان هي زعلانه ولا اعرف وش اسوي

من الخاص 📩 زوجي طلب آخذ تمويل باسمي 125 ألف راتبي 10300 والقسط بيكون حوالي 2850 يبي يسدد ديونه ووعدني يحول لي القسط كل شهر والثقه فيه مش ولا بد وأساعده ولا اخليه يدبر نفسه عشان مايوهقني

من الخاص 📩 متقاعدة وعمري 57 ومعاشي 7140 عندي ولدين بالجامعة ومصاريفهم 2600 شهرياً وجاني عرض أشتغل مشرفه براتب 4800 أرجع للعمل ولا أكتفي بتقاعدي والعيال هم يشتغلون

من الخاص 📩 أنا موظفة وراتبي 8750 وزوجي راتبه 11200 من تزوجنا وأنا أدفع 2300 شهرياً لمصاريف البيت الحين زوجي يبي آخذ تمويل 140 ألف باسمي عشان يبني أوافق وأوقف معه ولا أخاف أتورط بقرض 5 سنوات؟

من الخاص 📩 بنتي توظفت براتب 8650 وجمعت 94 ألف تبي تشتري سيارة جديدة بـ 132 ألف وعرضوا عليها تمويل الباقي بقسط 1180 أنصحها تدفع اللي معها وتستدين ولا تشتري مستعملة؟