احب ارجع كام خطوة ورا بس.. توضيحًا لكل كلمة اتكتبت عن الاحتفاء بمواقف الانسحاب او تجميد المشاركة في #الحوار_الوطني .. مشكورين انا واحدة ضمن ناس موقفي كان واضح من المشاركة في الحوار في ظل ان القبض مستمر، والتنكيل مستمر.. وقت السجن كنت مضطرة اقابل جهات امنية كانت بتيجيلي السجن بحجة نتكلم ونشوف انتي عايزة ايه "انا اللي مسجونة - وكأن القرار بأيدي" وقتها كنت مُصرة على موقفي، لاني على حق وكنت بتساوم على حياتي وحياة جوزي وابني.. ومع كل مرة كنت بتعرض فيها لبطش كنت بكون راضية لانه تمن بيتدفع وله مقابل.. حصل ان غيري من البنات كانت زيارتهم بتمشي كويس اوقات، تتوفر مستلزمات صحية ع الاقل.. كنت راضية ومقتنعة اني في يوم هخرج بس لما الحساب يتدفع بشكل كافي من وجهة نظرهم زي ما اتقالي!! بنقول شكرًا للي قرروا يسجلوا موقف، لكن المفترض المواقف دي كانت تتاخد من اشهر فاتت، لما صديقنا معاذ الشرقاوي اختفى 23 يوم.. لما علاء كان بيحتضر، او عن التعنت في عدم اخلاء سبيل السيدات السجينات.. باتريك زكي من اغلى الاصدقاء، باتريك من انقى الاشخاص اللي ممكن تقابلوهم ويستحق تضحيات مقابل حمايته.. ولكن التحرك حصل عشان الذُعر اللي اصاب صاب الناس انهم في لحظة هيبقوا مرشح سجين محتمل من تاني، مهما كان هو مين.. لان بمجرد المشاركة في قعدة مع وجود تنازلات هنا بتخلص الحدوتة.. ولان كل حاجة بتخلص بجرة قلم، ولان رأس الدولة قال صراحة انا حاطط الناس في السجون عشان بحمي البلد!! من البداية حاولنا نقول اننا ياجماعة كلنا في مركب واحد، واغلبنا داق من نفس الكاس، فمن الطبيعي اننا نكون سند لبعض.. لكن اللي حصل للأسف، ان البعض ساب ثغرة لشق الصف، ويتقال ده خاين وده سافر وحاجة في منتهى الاسفاف والخزي.. نهايته.. مش عيب ياسادة ان الناس تدور على الامان، سواء جوة البلد او برة بعد ما الارض لفظت البعض مننا واترموا في بلدان غريبة وباردة.. بس العيب الحقيقي اننا نعاير بعض وكأن قرار السجن والتهجير بأيدينا!! العيب الحقيقي بالسماح ان المعتقليين تبقى قربان سكوت وصمت وتغاضي!! عشان مفيش صوت يعلوا على صوت الطبنجة الميري ! ولانه ما ينفعش نفضل رهائن للخصومة السياسية حمدلله على سلامة حبايبنا.. ولسه مكملين عشان لنا كثير جوة عندهم.. #FreeThemAll #الحرية_حق