MWENEZI TAIFA AONGOZA MAAFUNZO YA WANACHAMA WA CCM NGAZI YA KATA JIJINI ARUSHA Katibu wa NEC Itikadi Uenezi na Mafunzo wa CCM TAIFA *Ndugu Kenani Laban Kihongosi* leo ameongoza mafunzo kwa wanachama wa CCM ngazi ya Kata jijin Arusha yanayohusu Historia ya CCM, Itikadi ya Chama, Maadili ya Viongozi na wanachama pamoja kuhamasiaha Ulipaji wa Ada, na Usajili wa Wanachama wapya. Mafunzo hayo yanaendelea Nchi nzima katika ngazi ya Mikoa, Wilaya na Kata.

MRADI WA SGR TABORA–KIGOMA UTABADILISHA MAISHA YA WATANZANIA NA KULETA MAPINDUZI YA KIUCHUMI – MBARAWA Waziri wa Uchukuzi, Profesa Makame Mbarawa, amesema mradi wa reli ya kisasa (SGR) katika kipande cha sita (Lot 6) kutoka Tabora hadi Kigoma unatarajiwa kubadilisha maisha ya Watanzania na kuchochea maendeleo ya kiuchumi na kijamii, kwa kurahisisha usafiri na usafirishaji wa watu na bidhaa. Amesema hayo leo Jumapili Oktoba 25, 2026 akikagua maendeleo ya utekelezaji wa mradi huo. Profesa Mbarawa amebainisha kuwa, mradi huo unatarajiwa kukamilika mwaka 2029, huku treni zitakazotumia reli hiyo zikitarajiwa kwenda kwa kasi ya kilomita 160 kwa saa, hatua itakayosaidia kurahisisha safari na kuongeza ufanisi wa usafiri wa reli. Ameongeza kwa kusema kuwa, kazi zinazoendelea katika kipande hicho zinahusisha ujenzi wa miundombinu ya msingi, ikiwemo madaraja, makalvati na misingi, ambayo ni muhimu kabla ya kuendelea na ujenzi wa matuta na utandikaji wa reli. Ameendelea kwa kusema kuwa, Serikali inaendelea kuhakikisha fedha zinapatikana na mkandarasi analipwa kwa wakati kupitia cheti cha malipo ya mkandarasi inayowasilishwa (Contractor's Payment Certificate), ili kuwezesha kazi kuendelea kwa kasi na mradi kukamilika ndani ya muda uliopangwa. Kwa upande wake, Mkurugenzi Mkuu wa Shirika la Reli Tanzania (TRC), Mhandisi Machibya Shiwa, amesema eneo la Malagarasi ni miongoni mwa maeneo yenye changamoto kubwa katika ujenzi wa kipande hicho cha Tabora–Kigoma, kutokana na umuhimu wake katika usafirishaji wa vifaa na utekelezaji wa mradi. Amesema eneo hilo linahitaji misimu mitatu ya kiangazi ili kuruhusu kukamilishwa kwa sehemu ngumu za ujenzi zenye urefu wa takribani kilomita 30 hadi 40. Mhandisi Shiwa amesema utekelezaji wa kazi katika eneo hilo umefikia asilimia 12, akieleza kuwa mkandarasi alianza na maeneo yenye changamoto kubwa ili kurahisisha hatua zinazofuata za ujenzi wa reli. Utekelezaji wa mradi wa Reli ya kisasa (SGR) katika kipande cha sita (Lot 6) Tabora–Kigoma unaendelea katika maeneo mbalimbali , huku eneo la Malagarasi likiwa miongoni mwa maeneo muhimu ya mradi huo kutokana na ujenzi wa daraja kubwa linalowezesha kupita katika eneo hilo lenye changamoto za kiuhandisi.