معاذ المشعلي | تسويق ونمو

جاني عرض سعر من مصور مقاطع تكتك ١٨ ألف ريال وأسعاره كأنها من ٢٠١٧ وقتها كان التصوير شغلة قليل اللي يتقنها اليوم الجوال يصور بجودة عالية والمصورين كثروا والعميل صار يقارن قبل يدفع والمستقل اللي ما يحدث أسعاره من السوق ما يخسر عميل واحد يخسر كل عميل يقارن التسعير الصح ما يجي من تعبك ولا من رقم حطيته قبل سنين يجي من ثلاث أشياء كم يدفع السوق اليوم على نفس الشغل وش النتيجة اللي تعطيها للعميل ووش يفرقك عن غيرك والغالي ما هو غلط بس لازم العميل يفهم ليش هو غالي سؤال للمستقلين كيف تسعرون شغلكم؟ وسؤال لأصحاب المشاريع تدفع ١٨ ألف على تصوير مقاطع تكتك؟

الإعلان اللي يجيب لك زحمة ممكن يكون أخطر إعلان تسويه تشوف المحل مليان والرسائل ما توقف وتقول نجحنا وآخر الشهر تحسب وتلقى المبيعات نفسها أو أقل لأن الزحمة شي والمبيعات شي ثاني الإعلان جاب ناس تتفرج بس ما فيه شي خلاهم يشترون إما العرض ما كان واضح أو السعر طلع غير اللي توقعوه أو سألوا وما لقوا أحد يرد عليهم بسرعة أو الإعلان أصلاً وصل لناس ما يحتاجون منتجك والمشكلة إن صاحب المشروع يشوف الزحمة ويزيد الميزانية وهو كذا يدفع أكثر على نفس الغلط قبل تزيد ريال واحد على الإعلان اسأل نفسك كم واحد سأل وكم واحد اشترى ووين راحوا اللي بينهم هنا تعرف وش مشكلتك الحقيقية ولو إعلاناتك تجيب تفاعل وما تجيب مبيعات لا تزيد الميزانية قبل تعرف وين يضيع العميل

أغلب المشاريع ما تموت فجأة تموت في أول ٣ أشهر وصاحبها ما يدري لأنه في البداية يشتغل على الحماس يفتح ويصرف على الديكور والافتتاح والإعلان وأول شهر الناس تجي من الفضول وثاني شهر يخف الزحام وثالث شهر يكتشف إن ما عنده عميل يرجع وهنا الفرق بين مشروع يعيش ومشروع يقفل المشروع اللي يعيش صاحبه استغل أول ٣ أشهر يسأل كل عميل ليش جيت؟ وش عجبك؟ وش ما عجبك؟ تبي ترجع؟ ويعدّل كل أسبوع على اللي سمعه أما اللي يقفل فصاحبه كان مشغول يحتفل بالافتتاح أول ٣ أشهر ماهي وقت البيع هي وقت تعرف فيه عميلك ولو مشروعك في أول سنته وتحس إن الزحام بدأ يخف هذا أول شي لازم تشتغل عليه

شغلة لازم تتأتمت في أي شركة عقار متابعة العميل اللي سأل وما رجع يتصل يسأل عن شقة ويقول أفكر وأرد عليكم والموظف يكتب رقمه في ورقة أو ينساه وبعد أسبوع العميل اشترى من مكتب ثاني رجع له وتابعه أتمتة الأعمال هنا ترسل له رسالة بعد يومين فيها صور الشقة وموعد معاينة وبعد أسبوع ترسل له خيار ثاني قريب من ميزانيته ولو رد تحوله للموظف على طول العميل في العقار ما يشتري من أول اتصال يشتري من اللي تابعه لين آخر يوم لو عندك شركة عقار أو تعرف أحد عنده أرسلها له 🔖

كلمة وحدة كانت بتوفر علي أشهر من التعب في بداية شغلي لا كنت أقبل أي عميل يجيني وأحسب إن كل عميل فرصة وإن الرفض خسارة وأنا للحين أبدأ والنتيجة إني صرت أشتغل مع ناس ما يناسبهم شغلي ولا يناسبني شغلهم عميل يبي نتايج بكرة وعميل يغير رأيه كل أسبوع وعميل ميزانيته ما تكفي حتى يجرب وأنا بينهم أركض وما أقدم شي يرضيني والأسوأ إن العملاء اللي يناسبوني فعلاً ما لقوا عندي وقت اليوم أول شي أقوله لأي صاحب مشروع يجلس معي العميل الغلط ماهو بس يتعبك العميل الغلط ياخذ مكان العميل الصح وإذا تحس إن مشروعك مليان عملاء ما يناسبونك هذا أول شي نشتغل عليه في الاستشارة

مشروعك ما يكبر مو لأن منتجك ضعيف مشروعك ما يكبر لأنه واقف عليك أنت كل قرار لازم يمر عليك كل عميل زعلان يبي يكلمك أنت كل موظف يسألك قبل ما يتحرك وأنت تحسب هذا اهتمام وحرص بس الحقيقة إنك صرت أنت السقف المشروع ما يقدر يكبر أكثر من وقتك وأول ما تغيب أسبوع كل شي يوقف المشاريع اللي تكبر صاحبها بنى نظام يمشي بدونه خطوات واضحة وصلاحيات واضحة وناس يعرفون وش يسوون بدون ما يسألون لو تغيب عن مشروعك أسبوع كامل وش اللي بيوقف؟ 👇

المتجر رفع السعر من ٢٥٠ لـ٥٠٠ قبل أسبوع وحط عليه خصم ٥٠٪ وأنت فرحت إنك وفّرت 🙂 صوّر سعر أي منتج تبيه الحين وقارنه في الجمعة البيضاء ..

واحد من المتابعين أرسل لي هذي بعد التغريدة 😂 العطر بـ٢٤٩.٥٠ والشحن مجاني فوق ٢٥٠ باقي لك نص ريال بس 🙂 وفيها حيلتين مع بعض خصم ٥٠٪ وشحن مجاني على الحافة تتوقعون وش بيضيف عشان النص ريال؟ 👇

التوصيل مجاني للطلبات فوق ٢٠٠ ريال وأنت سلتك فيها ١٧٠ وش تسوي؟ 😂 تضيف منتج بـ٤٠ ما تحتاجه عشان توفر ١٥ ريال توصيل وهذا بالضبط اللي يبيه المتجر