Sam Ibrahim

روحت اتبرع لمستشفى أبو الريش للأطفال ، وأول ما وصلت شفت طفل متكفن ، يجى أربع أو خمس سنين من طوله على إيد باباه ، وواحد مستنيه بموتوسيكل ، ومامته بتجرى وراه ومعاها واحدة ، بيقولوا لو ملقناش ميكروباص هنتصرف ونيجى ، وفضلوا يجروا في الشارع ورا الموتوسيكل ، اللى هو مفيش تاكسى ياخدوا ابنهم فيه ، مش معاهم فلوس .. وأنا اتسمرت مش فاهم حاجة ، وفهمت بعدها من واحدة كانت واقفة جنبى طفلة يجى ١٢ سنة .. قالتلى: ده كان داخل على رجله ، واتوفى ، مامته كانت بتقول كدة وهى بتصرخ .. لهجتها صعيدية ، قالتلى أنا من أسوان ، بس لينا قرايبنا قاعدين عندهم ، جه أخوها يجى تلات سنين ، لقيت فى إيده كانيولا يا حبيبى ، وواقف جنبها الولد حافى .. أى وقت بالليل تعدى جنب سور المستشفى ، هتلاقوا ناس نايمة في الشارع ؛ دول أهل الأطفال اللى جوه مش معاهم إمكانيات يأجروا مكان يباتوا فيه ؛ فبيناموا في الشارع وكمان ساعات يندهوا على أهل الطفل ، محتاجين لبن .. محتاجين دواء .. يعنى منتهى الذل .. دخلونا للمدير الإدارى ، الراجل رحب بينا ، وجاب لنا مدير الخدمة الاجتماعية ، طلعنا مكتبه وجاب ملف فيه حالات محتاجة .. أطفال محتاجة علب لبن ، ومفيش إمكانية ، يعنى ممكن يموتوا عشان مفيش لبن .. طفله عندها ٨٠ يوم ، عاوزة أنبوبة أكسجين ،، ومفيش إمكانية ، وأهلها بيلفوا يدورا على حد يسلفهم .. طفل محتاج دوا بألف جنيه ، وحالته خطيرة ، مش مع المستشفى غير ٢٠٠ جنيه ، وكمان تبرعات .. وحالات كتيييييير مش قادر أوصفها ، بس دول اللى فاكرهم .. المستشفى فيها أورام وقلب مفتوح وفشل كلوى ، فبقوله: يا فندم ليه مش عامليين دعايا ؟! قال لي: احنا مش معانا نصرف على الدعايا .. التبرع إنك تساهم فى علاج حالة ، أو تتكلف بروشتة ، وهما يبلغوك محتاجين كام ؟؟ أو تعين أسر فقيرة مش لاقية تاكل ، وليها حالات عندهم .. فيه أسر جاية من أدغال مصر ، وفى أسرة مش معاها موبايل ، متخيليين إنهم قاعدين في الشارع ، عشان لو حصل حاجه محدش هيعرف يوصلهم .. أى جنيه بتدفعوا بيبعتوا عالواتس صورة بالفاتورة ، الراجل قال: إحنا هنا بفضل ربنا ، وتبرعاتكم هى اللى ساندانا .. انا مكنتش ناوي خااااالص أقول لحد ، بس بعد اللى شفته بعينى ، وأد ايه الناس دى محتاجة ومحدش يعرف عنهم حاجة .. دول أطفال بتموت ، وأطفال فى حضانات ، وأطفال عندها أورام ، واللى عندها أيام وتموت ، وأطفال صمامتها مسدودة ، وعندها أكتر من ثقب ، وأمهات شفتها شايلة عيالها صغيرييييين ، وفى إيديهم الكانيولا ، كنت عاوز أبكي جنبهم .. حمدت ربنا على كل نعمة مش حاسين بيها ، وإن الحمد لله أولادي كويسين .. ربنا يجيرهم فى مصائبهم .. لو كل واحد فينا أقل الايمان ، خد خمسين جنيه وراح هناك ، أقسم بالله ممكن تنقذ طفل ، احنا بنشترى تفاهات كل يوم ، وكولا وشيبسي وشوكولاته وبناكل بأكتر من كده ، أكننا مش هناكل من بره يوم .. ممكن كل كام واحد أو واحدة وصحابهم ، يلموا من بعض ويتصدقوا كل شهر هناك ، وخلوا كل مرة نية حلوة للصدقة الجميلة دى .. مرة تنجح ، مرة تتجوز ، مرة يطول فى عمر أهلك ، مرة لمتوفى، والله والله ربنا اكرم مننا ؟ احنا اللى محتاجين ده مش هما .. طولت عليكم وياريت تعملوا شير ؛ عشان الكل يشوفوا إبداء بنفسك وساعد غيرك .. مستشفى أبو الريش للأطفال ، فيها اطفال بتموت عشان أهلهم مش معاهم ٥٠ جنيه يجيبوا علاج .. اللي عاوز يتبرع يروح بنفسه، ويجيبلهم علاج أو دم أو يتبرع فى حسابهم فى بنك ناصر الاجتماعي وفيه وسيلة سهلة للتبرع عن طريق خدمة فوري .. المستشفى معندهاش فلوس ؛ علشان تعمل دعاية زى مستشفى 57 أو مجدي يعقوب ، فخلينا احنا نبقى الدعاية بتاعتها ...... شير فى الخير .. عايزين نشير علشان الناس تساعد .... والخير دوار ... شير فى الخير دعوة للتبرع لمستشفى أبو الريش للأطفال .. ربنا يتقبل .. لا تستصغروا فعل الخير .. فربما كانت هي المنجية .. ( علي فكرا احنا نقدر نعمل احسن اعلان للمستشفي دي نحط الكلام دا ف جروبات وع صفحات دا لو مش هتقدر تتبرع ليها غيرك ممكن يشوف الكلام دا وربنا يقدروا ويساعد #مستشفى_ابو_الريش_للاطفال منقول

تويته مسخره وخفيفه 😉👇👇👇 إيه اللي بندور عليه كلنا؟ تكوين علاقات إنسانية. إيه أكتر حاجة بتستنزفنا كلنا؟ العلاقات الإنسانية. إيه الدرس المستفاد؟ إن مافيش دروس مستفادة.. تحت ضغوط الاحتياج للآخر، والخوف من الوحدة، والفرار من العزلة، بنلجأ لبعض، وبنستنزف بعض.. بنلجأ لبعض حتى لو بنستنزف بعض.. بنلجأ لتعاستنا بنفسنا، ونسعى لبؤسنا برجلينا.. في الشارع، في الشغل، في البيت، ع الكافيه، هاتلاقيهم قاعدين، أو داخلين عليك المكان، من غير عبايات سودا، ولا أنياب طويلة، ولا عيون ميتة.. مش هاتنجدك عملة فضية، ولا وتد مدعوك بتوم مفروم.. مش هاتطلع شمس النهار تحرق جلودهم الشاحبة، ولا تقضي على سلالتهم.. أبطال التويته بتاعنا المرة دي مش مصاصي دماء، دول ڤامبايرز عواطف، مصاصو طاقة نفسية، وحوش بدرجة مرضى، أو مرضى برتبة وحوش.. فجأة هاتحس إنك بتسقّط، جفونك تقيلة، وكابس عليك النوم، مزاجك ينهار دفعة واحدة للحضيض، عندك نهم للحلويات، والنشويات، تحس انك مضغوط وعصبي ومطرح ما تحط، تنبط.. عندها لازم تنتبه، وتدور بعينيك عن فصايل الڤامبايرز النفسيين الخمسة المشهورين.. ڤامبايرز العواطف منحدرين من خمس عائلات كبار، كل عيلة ليها سماتها وطقوسها الخاصة، وضحاياها المميزين: • العيلة الأولى (النرجسيين): شعارهم أنا أولا …كل شيء بيدور حواليهم، وعندهم إحساس بالعظمة، وشعور مبالغ فيه بأهمية الذات.. جعانين اهتمام، ومتعطشين للإعجاب.. خطورتهم ف عجزهم عن التعاطف الإنساني، وكفرهم بالحب غير المشروط.. لو ما عملتش الحاجات زي ما هم عايزين، يتحولوا لآلات عقاب، بخيلة بالمشاعر والموارد، وباردة عاطفيا. العيلة التانية (الضحايا): هاتلاقي أفراد العيلة دي بتتغذى على عواطفك بأسلوب أنا مسكين العالم كله ضدهم، وكل الآخرين سبب بؤسهم ومتاعبهم.. لما هاتقدملهم حلول هايقولولك أيوه، بس ف النهاية هاتلاقيك بتعمل التليفون سايلنت لما يتصلوا، وبتتحاشى تقابلهم ف أي مكان.. كصديق هاتبقى نفسك تساعدهم، بس حكاياتهم عن بؤسهم اللامنتهي بتجهدك، فما تقدرش. العيلة التالتة (المسيطرين): العيلة دي مهاويس بفكرة السيطرة على الآخر، هاتلاقيهم بيملوا عليك إزاي المفروض تحس أو تفكر أو تتصرف.. لهم رأي ف كل وأي شيء بتعمله، وللسيطرة عليك هايشككوك ف عواطفك وتصرفاتك، لما تبقى مش مناسبة ليهم، أو مش ماشية ع الكاتالوج بتاعهم.. غالبا هاتلاقيهم بيبتدوا حوارهم معاك بجملة على غرار انت عارف انت ناقصك إيه؟وبعدها يبتدوا يقولولك بالظبط المفروض تبقى ازاي.. ف النهاية هاتلاقي نفسك تحت قبضتهم، وحاسس إنك قليل، ومهدد بفوقيتهم. العيلة الرابعة (الحلاقين): المتحدثين بلا انقطاع، الرغايين.. العيلة دي مش مهتمة خالص بمشاعرك، ولا تكترث بك من أساسه، كل اهتمامهم بحكاياتهم، ونفسهم.. عندهم قصة مثيرة لا تنتهي عن كل شيء تافه بيحصل لهم أو بيحصل معاهم.. مهما انتظرت الفرصة عشان تمسك طرف الحديث، مش هاتعرف.. هاتلاقيهم بيقتحموا مجالك الشخصي، وبيكلموك وهم حاطين بقهم ف وشك، وكل ما تحاول تبعد، يقربوا بقهم من وشك أكتر.. خاف على نفسك.. المقص ف إيديهم. العيلة الخامسة والأخيرة (ملوك وملكات الدراما): الهستيريين، اللي كل حدث سيئ تافه ولا يُذكر بيحصل لهم، يتحول عندهم بقدرة قادر لميلودراما ومأساويات أمينة رزقية.. أنا قمت م النوم زي الزفت، والدنيا كلها كوارث، الشرابات بتاعتي مش لاقيها والمية قاطعة.. جالي امبارح دور برد وكنت باموووووت.. وما إلى ذلك من كوارث طبيعية بتحصل لهم. بالتأكيد بعض العلاقات الإنسانية بتبقى حيوية، وبتشحنك طاقة وحب للحياة وإقبال عليها، لكن كتير منها (بسبب العائلات الخمسة دول) بتبقى مجرد خرم ف وعاء طاقتك النفسية.. تمشي معاهم وانت بتسرسب سلام نفسي، وتفاؤل، لحد ما تلاقي نفسك مشحّر، وما عندكش.. آه ما عندكش. العلاقات بأفراد العائلات الخمسة مش بس منهكة جسديا، دي بتبقى أشبه بسرطانات عاطفية، بتدمر كل مشاعرك الحلوة، وتسيبك محطم، بشعور إنك غير جدير بالحياة، وغير محبوب.. يكسّروا روحك حتة حتة، ويهدّوا بنيانك النفسي نقرة نقرة: حبيبي أنا شايفة ان وزنك زاد شوية اليومين دول.. حبيبتي انتي حساسة زيادة عن اللزوم.. وهكذا.. واحدة واحدة تبقى مش طايق نفسك، وخجلان منها، ومنهك نفسيا.. لعبتهم الأساسية هي العبث بمناطق ضعفك، والنقط الهشة ف جدار ثقتك بنفسك.. عشان تحمي نفسك من الاستنزاف النفسي والعاطفي دا، لازم يبقى عندك وعي بالعائلات الخمسة دي، وتعرف تميزهم.. تفرز علاقاتك، وتحتفظ حواليك بناس تمدك بصورة إيجابية عن نفسك.. كمان لازم تتعلم تحط حدود للنماذج اللي بتغذيك بكل صورة سلبية عنك، وما بتعملش حاجة غير كركبة الدنيا على دماغك