سَمَر

نصيحتي للنساء بقا من أول ١٨ سنة واحنا طالعين من ست في منتصف تلاتيناتها: أولوياتك يا حبيبة قلب أختك هي كالتالي (زهرات الأُنثى ال٧) 🌻- صحتك الجسدية والنفسية وماتهمليش النفسية عشان هم منفدين على بعض. 🌻- تعليمك تعليمك تعليمك ومهاراتك، واستثمري في هواية/حرفة جنب شهادتك، التعليم مش بس شهادات. 🌻- علاقتك بأهلك لو ولاد حلال برّيهم بكل ما أوتيتي من قوة لأن هم دول ضهرك وسندك ولو مؤذيين اتقي شرهم بس ماتفتكريش حد تاني هيعوضك اللي حرموكي منه، ماحدش بيقدر يكون أب أو أم لحد تاني وماحدش بيقدم دعم غير مشروط إلا الأهل اللي فيهم الخير. 🌻- شغلك وفلوسك، استقلالك المادي وذمتك المالية الخاصة مش محل نقاش مع إنسان في الكون واللي ما يشجعكيش على ده قلبه مش عليكي كفاية حتى لو من دمك. "ذُل من لا استقلالية مادية له في كُل عصر وأوان" يعني اللي ما بيصرفش على نفسه مالوش قرار في حياته، ولو تخيل إن ليه قرار يبقا ده بس من حُسن حظه المؤقت عشان مافيش تعارُض حالي بين قراراته وقرارات اللي بيصرف عليه، والفيديو ده أكبر دليل وحياتنا كُلنا مليانة أدلة. 🌻- صداقاتك، وبالذات بالنساء، قربي من ستات جدعة وطيبة ومجتهدة وحنينة وشاطرة، الست للست دعم وأخوة وحنان وملاذ ومرح. 🌻- دورك المجتمعي مُهِم، مش بس المرتبط بشغلك اللي بتاخدي عليه أجر مادي ولا بدورك في حياة أهلك وأصدقائك، بل إن وجودك كأنثى في مجتمعك (الواقعي والافتراضي/البيت/الشغل/المدينة/المحافظة/الجامعة/الgym/أي نشاط) قيمته كبيرة ومحتاجة تشوفي بتقدري تقدمي ايه للمجتمع ده حتى ولو كان كلمة طيبة، جيرة آمنة، تشجيع للستات اللي زيك، ذكرى طيبة لأطفال بكرة هيكونوا أدك، طاقة/فكرة/مشاعر إيجابية تقدري تنشريها. 🌻- اختيارك للراجل المناسب مش هيحصل إلا لو كنتي مدركة إن دوره كشريك ببساطة إنه يرافقك الرحلة ويعمل معاكي أسرة طيبة حتى لو مكونة منكوا انتو الاتنين بس ويلبي احتياجاتك كأنثى من الشريك العاطفي يعني بشكل مُبسط "يديكي حُب أكتر تديله حنان يا سُكر"، لكن لا شغلته يكملك ولا يوفرلك بيت ومصروف شهري بطوله كده في الزمن ده ولا يرقيكي في السلم الاجتماعي، لا شغلته ولا شغلتك، ولو هتقدميله تضحيات لازم تكوني متأكدة إنه مقدملك تضحيات بنفس قيمتها ليكي قصادها، أمال شغلته ايه؟ شغلته إنه رفيق للرحلة، يخليكي مبسوطة ومرتاحة معاه وملبية احتياجاتك العاطفية والجسدية وانتِ شُغلتك نفس الحاجة، ودوره الإنساني إنك تكوني حاسة معاه بالاحترام والسكن والأمان، غير كده للأسف مش هقولك زي عدمه بل أسوأ من عدمه ألف مرة، عدم وجود راجل وانت مجمعة ال٦ زهرات اللي فوق مقدور عليه تمامًا مقارنة بوجود راجل واقف زي المطب بينك وبين زهراتك ال٦ الأهم وبينك وبين نفسك أصلًا. دي اسمها سُباعية يارا لأنوثة مُفعمة بالحياة وقلب قادر على مُكابدة الزمن وعقل نشط مستعد لالتقاط الحكمة.🌻🌻🌻🌻🌻🌻🌻