Khalid Khan Supari

تحریک انصاف کے منتخب نمائندوں اور کارکنان کو مصلحت پسندی کا طعنہ دینا ان کی قربانیوں سے ناانصافی ہے۔۔ پاکستان تحریک انصاف کے اراکین قومی و صوبائی اسمبلی، قیادت، عبدیداران اور کارکنان کو مصلحت پسندی کا طعنہ دینا ان کی مسلسل جدوجہد، ثابت قدمی اور قربانیوں سے نانصافی ہے۔ ہمیں ان غیر معمولی حالات کو سمجھنا ہوگا جن میں ہمارے ساتھی اپنے سیاسی مؤقف پر قائم ہیں۔ 8 فروری 2024 کے عام انتخابات کے بعد ہمارے 13 سے زائد اراکین قومی اسمبلی اور متعدد صوبائی امیدواروں کو محض اس لیے ان کی نشستوں سے محروم کیا گیا کہ انہوں نے عمران خان صاحب کا ساتھ چھوڑنے سے انکار کر دیا۔ انہوں نے نشستوں کی قربانی قبول کی مگر اپنے قائد سے وفاداری پر سمجھوتہ نہیں کیا۔ بعد ازاں ضمنی انتخابات میں بھی عمران خان صاحب کی ہدایت پر بائیکاٹ کیا اور انتخاب نہیں لڑا۔ کیا وزیراعلیٰ سبیل آفریدی، جنہیں حکومت کے خاتمے اور گرفتاری جیسے حالات کا سامنا کرنا پڑا، مصلحت پسند تھے؟ کیا حماد اظہر، جنہوں نے تمام تر مشکلات کے باوجود عمران خان صاحب کا ساتھ نہیں چھوڑا، مصلحت پسند ہیں؟ کیا فیاض چھجڑا، جن کے نوجوان بیٹے کو مبینہ طور پر اٹھایا گیا، داور کنڈی اور احسن جمال خان جیسے منتخب نمائندوں کی ثابت قدمی کو مصلحت پسندی کہا جاسکتا ہے؟ خیبر پختونخوا میں ہمارے اراکین اسمبلی کے خلاف مقدمات، گھروں اور حجروں پر چھاپے اور اہل خانہ کو درپیش مشکلات بھی اسی جدوجہد کا حصہ ہیں۔ کیا ڈاکٹر یاسمین راشد، شاہ محمود قریشی، عمر سرفراز چیمہ، میان محمود الرشید اور چوہدری اعجاز صاحب نے مصلحت پسندی کی خاطر جیل کی صعوبتیں برداشت کیں؟ وہ قید میں رہ کر بھی عمران خان صاحب کے نظریے اور اپنے سیاسی مؤقف پر قائم ہیں۔ کیا چترال کے عبداللطیف چترالی نے اپنی نشست بچانے کے لیے نظریہ چھوڑا؟ کیا ہمارے معزز اتحادی صاحبزادہ حامد رضا کو کسی نشست یا عہدے کی لالج تھی؟ انہیں قید اور سزا کا سامنا کرنا پڑا اور اپنی قومی اسمبلی کی نشست سے بھی محروم ہونا پڑا۔ یہ مصلحت پسندی نہیں، سیاسی وابستگی کی خاطر دی جانے والی قربانیاں ہیں۔ خیبر پختون خواہ کے ہمارے ایم این اے ایم پی ایز اج بھی بڑی تعداد میں اغوا ہے اور کوئی پتہ نہیں کہاں ہے۔گوجرانوالہ، فیصل آباد، سرگودھا، اسلام آباد، راولپنڈی اور دیگر اضلاع میں ہمارے کارکنان، اراکین قومی و صوبائی اسمبلی اور رہنماؤں کو طویل سزائیں سنائی گئی ہیں۔ شبلی فراز، عمر ایوب خان اور خالد خورشید، بلال اعجاز ، احمد چٹھہ سمیت ہماری پارلیمانی قیادت کو مختلف مقدمات میں کئی دہائیوں پر مشتمل مجموعی سزاؤں کا سامنا ہے۔ کیا کوئی یہ سمجھتا ہے کہ جن لوگوں کو دس، بیس، تیس اور بعض مقدمات میں پچاس سے ستر سال تک کی مجموعی سزائیں سنائی گئیں، انہوں نے یہ سب محض ایم این اے یا ایم پی اے کی نشست بچانے کے لیے برداشت کیا؟ کس کو معلوم ہے کہ کون کب تک قید رہے گا؟ ایسے حالات میں ان کی نیت اور سیاسی وابستگی پر سوال اٹھانا یقیناً تکلیف دہ ہے۔ ہمارے ریکارڈ کے مطابق آج بھی تقریباً 1500 کارکنان، منتخب نمائندے، بلدیاتی عبدیداران اور پارٹی ذمہ داران مختلف صوبوں میں قید ہیں۔ تحریک انصاف کے کارکنان نے اپنے عمل سے ثابت کیا ہے کہ ان کے نزدیک عمران خان صاحب کے نظریہ اور اصولوں سے وابستگی عہدوں، اقتدار اور ذاتی مفادات سے کہیں زیادہ اہم ہے۔ ہمیں یہ بھی سمجھنا ہوگا کہ ہر شخص کے حالات، ذمہ داریاں اور دباؤ برداشت کرنے کی صلاحیت مختلف ہوتی ہے۔ اس فرق کو کسی کی وفاداری یا خلوص کا پیمانہ نہیں بنایا جاسکتا۔ ایم این اے ہو، ایم پی اے ہو، پارٹی چیئرمین ہو یا کوئی عام کارکن، سب بنیادی طور پر عمران خان صاحب کے کارکن اور ایک ہی جدوجہد کا حصہ ہیں۔ جب ایسے لوگوں کی قربانیوں کو نظرانداز کر کے انہیں مصلحت پسندی کے طعنے دیے جاتے ہیں تو یہ الفاظ ان کے دلوں میں تیر کی طرح لگتے ہیں۔ ہمارے معزز اتحادیوں اور سینئر اپوزیشن رہنماؤں سے مؤدبانہ گزارش ہے کہ وہ عوامی سطح پر ایسے تبصروں سے گریز کریں جو اپنے ہی ساتھیوں کی قربانیوں پر سوال اٹھائیں۔ ہم ان کی سیاسی جدوجہد اور تجربے کا احترام کرتے ہیں، لیکن ایسے بیانات سے فطری طور پر ردعمل پیدا ہوتا ہے اور اپوزیشن کے باہمی اعتماد اور اتحاد کو نقصان پہنچ سکتا ہے۔ خدارا، یہ وقت ایک دوسرے پر انگلیاں اٹھانے کا نہیں بلکہ ایک دوسرے کی مشکلات اور قربانیوں کو سمجھنے کا ہے۔ اختلافِ رائے ضرور ہو، مگر باہمی احترام اور حقائق کو سامنے رکھ کر۔ ہمیں ایک دوسرے کی کمزوریاں تلاش کرنے کے بجائے ایک دوسرے کی طاقت بننا ہے۔ ہماری مشترکہ ذمہ داری اپنے اتحاد کو مضبوط رکھنا اور تمام تر توجہ اپنے اصل مقصد پر مرکوز کرنا ہے، اور وہ مقصد عمران خان صاحب کی ناحق قید سے رہائی اور اس فسطائی نظام کے خلاف اپنی پُرامن، آئینی اور جمہوری جدوجہد کو جاری رکھنا ہے۔