Tanzanite

29.10.2026. SIKU YA MAOMBOLEZO YA KITAIFA. SIKU YA KUJITATHMINI NA KUJISAHIHISHA. Nilianza kumbukizi hii kwa kusali Misa Takatifu asubuhi katika kanisa langu la Mtakatifu Martha, Mikocheni. Baadaye nikashiriki mazungumzo na Jenerali Ulimwengu kupitia Post: youtube.com/live/lTdENudIxCc… Sasa napenda kutoa ujumbe wangu kuhusu siku hii, maana yake kwa Taifa letu na nini kifanyike ili tutoke katika mkwamo unaotukabili. 1. TUKUBALI MSIBA ULIOLIPATA TAIFA. Takwimu za Tume ya Rais iliyoongozwa na Jaji Mkuu Mstaafu Mohamed Chande Othman: vifo 518, wakiwemo raia 502 na maafisa wa vyombo vya ulinzi na usalama 16. Watoto 21 walipoteza maisha. Tume yenyewe ilitahadharisha kuwa idadi hii inaweza isiwe ya mwisho. Huu ulikuwa msiba wa Taifa, bila kujali tofauti zetu za kisiasa. Kila uhai una thamani. 2. POLE KWA WAHANGA WOTE. Familia zilizopoteza wapendwa wao, watoto waliobaki yatima, wajane, wagane, majeruhi na wote walioathirika. Nyuma ya kila takwimu kuna binadamu, familia na matumaini yaliyokatizwa. Kwa wote waliofiwa nasema: Hatujawasahau. Machungu yenu ni machungu yetu sote. 3. KWA NINI TUIKUMBUKE OKTOBA 29? Tume ya Chande ukurasa wa 52 wa hotuba ya Mwenyekiti wake ilipendekeza: “..Serikali kutenga siku ya Maombolezo ya Kitaifa kuwakumbuka Watanzania zaidi ya 500 waliofariki kwenye ghasia za wakati na baada ya Uchaguzi Mkuu wa Oktoba, 2025;” Bado tunaisubiri Serikali itangaze siku rasmi ya maombolezo. THRDC imependekeza tarehe 29 Oktoba iwe siku ya kumbukizi ya kila mwaka, na viongozi wa dini wamehimiza sala na tafakari. Kwa hiyo, tunapoitumia siku ya leo kuomboleza, tunafanya hivyo kwa nia njema, kuonesha mshikamano na kuwafariji wahanga wasije wakadhani Taifa limewasahau. 4. TUELEWE CHANZO CHA MGOGORO, SI VICHOCHEO PEKEE. Tume ya Chande ilitofautisha kati ya vyanzo vya ghasia na vichocheo vyake. Vyanzo ni kama mafuta, vichocheo ni kama kiberiti. Ilitaja vyanzo vitano: matatizo ya kisiasa na madai ya Katiba Mpya na mageuzi ya uchaguzi; ugumu wa maisha, ajira na fursa za kiuchumi; matatizo ya kijamii, rushwa na utekaji; udhaifu wa utendaji wa taasisi za umma; na changamoto za mahusiano ya kimataifa. Tume ilijadili pia vichocheo, vikiwemo kauli za baadhi ya wanasiasa na matumizi ya mitandao ya kijamii. Hata tukidhibiti vichocheo, hatutakuwa tumetatua tatizo kama mafuta yataendelea kuwepo. Ndiyo maana nimekuwa nikisisitiza umuhimu wa kutekeleza kwa vitendo falsafa ya Rais Samia ya 4Rs: Maridhiano, Ustahimilivu, Mageuzi na Kujenga Upya. Vijana wanahitaji kusikilizwa. Malalamiko yao yashughulikiwe, huku kila mmoja akiheshimu sheria na haki za wengine. TUTOKEJE KATIKA MKWAMO HUU? Ninapendekeza hatua zifuatazo: Serikali itoe msimamo kuhusu siku rasmi ya maombolezo iliyopendekezwa na Tume ya Chande. Wahanga wote wabainishwe, wafikiwe na kusaidiwa kulingana na mahitaji yao halisi. Uchunguzi huru wa matukio yenye viashiria vya jinai, mauaji na utekaji ufanyike, na wahusika wawajibishwe kwa mujibu wa sheria. Mapendekezo ya Tume kuhusu Katiba Mpya, mageuzi ya uchaguzi, uwajibikaji wa taasisi na maridhiano yafanyiwe kazi. Wazee, viongozi wa dini, wanawake na vijana washirikishwe kikamilifu katika kujenga uelewano wa kitaifa. Maridhiano si kufuta ukweli, kusahau wahanga au kuacha kuwajibisha waliovunja sheria. Maridhiano ni kuwa na ujasiri wa kukiri mapungufu, kutenda haki, kurekebisha makosa na kujenga upya imani ya wananchi katika taasisi zao. Ndugu zangu Watanzania, Oktoba 29 isiwe siku ya kuchochea visasi. Iwe siku ya kujitathmini na kujisahihisha, kuthamini uhai wa binadamu na kujiwekea dhamira kwamba madhila haya hayatatokea tena. Tusisahau waliopoteza maisha. Tusiwaache wahanga peke yao. Tusifanye hofu kuwa mbadala wa amani. TUKUMBUKE. TUJITAFAKARI. TUJISAHIHISHE. TUTENDE HAKI. TUPONYE MAJERAHA. TURIDHIANE NA TUSONGE MBELE KAMA TAIFA MOJA. Mwenyezi Mungu azilaze roho za marehemu mahali pema peponi, awafariji wafiwa, awaponye majeruhi na alijalie Taifa letu amani ya kweli, amani yenye haki. Amina.