Ace

فيه ست أعرفها كتفها مخلوع ومحتاجة MRI ومش قادرة تنزل شغلها بقالها أكتر من أسبوع، وبيتها مفيهوش أكل. ابنها من ذوي الإعاقة ومحتاج تحاليل وأشعات عشان يقدم على بطاقة الإعاقة، وميعادهم ٤/١١. اللي يقدر يساعد بأي حاجة يبعتلي ابعتله رقم يحوّل عليه أي فلوس تفيض هديهالها بإيدي.

نجاح محمد مبروك، محامي توفى في ليمان المنيا يوم 30 سبتمبر 2026 بعد تدهور حالته الصحية بسبب الفشل الكلوي الحاد. كان محتاج علاج منتظم ونقله لمستشفى متخصص، لكن الاستغاثات اللي طالبت بنقله قبل وفاته ما استجابتش لها إدارة السجن

مدثر محمد عبد الحميد، 24 سنة وطالب بكلية الهندسة اتقبض عليه بسبب دعمه للقضية الفلسطينية وفضل محبوس حوالي 11 شهر في سجن العاشر من رمضان. فبدأ إضراب عن الطعام يوم 29 أغسطس 2024 احتجاجًا على استمرار حبسه وظروف الاحتجاز، وقال إنه ممنوع من التريض والشمس، ومن الكلام أثناء جلسات التجديد

ربيع سعيد حسن محمد نصر، 24 سنة كان محبوس على ذمة قضية جنائية في قسم سيدي جابر بالإسكندرية. اتعرض لهتك عرض وضرب وصعق بالكهربا وإهانات، بعد رفضه التعاون كمرشد، واتهدد بتلفيق قضية جديدة. قدم بلاغ للنيابة، وبعدها اتحط في الحبس الانفرادي واتعرض لضغوط للتنازل عنه.

صبري شكري من جزيرة الوراق اتقبض عليه في أحداث مسجد الفتح في أغسطس 2013 وهو عنده 16 سنة. رغم إنه أخد 4 براءات في قضايا مختلفة، الأمن الوطني رفض يفرج عنه، واتعرض للتعذيب واتشال جزء من جبهته، وده سبب له عاهة مستديمة.

عبد الفتاح محمد عبد المقصود عبيدو، 60 سنة، مدرس لغة عربية بالأزهر من منشأة أدهم بالدقهلية اتقبض عليه سنة 2023 واتحجز في سجن جمصة. توفى في أبريل 2025. وفاته كانت نتيجة سوء ظروف الاحتجاز والإهمال الطبي.

ياسر محمد الخشاب، من دمياط كان محبوس بقاله حوالي 10 سنين. الداخلية قالت انه توفى يوم 11 أبريل 2025 داخل مستشفى سجن بدر أثناء خضوعه لعملية قلب مفتوح.

محمود أسعد، 26 سنة اتقبض عليه من الشارع واتحجز في قسم شرطة الخليفة، ومنعوا أهله من زيارته. توفى يوم 12 أبريل 2025 بعد كام يوم من احتجازه، وظهرت على جسمه آثار إصابات في فيديوهات. الداخلية قالت إنه توفى بعد مشاجرة بين المحتجزين

أحمد طارق عربان، 32 سنة اتقبض عليه يوم 15 ديسمبر 2021، وفضل محبوس واتعمله تدوير على 15 قضية بنفس الاتهامات. في مايو 2025 كان مختفي قسريًا بقاله 29 يوم رغم صدور قرار بإخلاء سبيله. اتعرض قبل كده للاختفاء القسري والتعذيب، منعرفش عنه حاجة من وقتها لغاية دلوقت

عبد العزيز عبد الغني محمد، 62 سنة ،موظف على المعاش اتقبض عليه واتحجز في مركز شرطة أولاد صقر بالشرقية. خلال 25 يوم من احتجازه عانى من انسداد معوي حاد، وكان محتاج عملية بشكل عاجل بعد مماطلة في علاجه اتدهورت حالته لحد ما توفى جوه مركز الشرطة.

أحمد دسوقي مصباح زغلول اتقبض عليه سنة 2016 قبل فرحه بأسبوع، وفضل مختفي قسريًا أكتر من شهر ونص قال إنه اتعرض للصعق والضرب. اتحكم عليه بالمؤبد في قضية «محاولة اغتيال النائب العام المساعد». وفي يونيو 2025 بدأ إضراب عن الطعام بسبب تدهور صحته وحرمانه من العلاج

جمال أحمد صاوي إبراهيم، 70 سنة كان محكوم عليه بـ15 سنة في قضية فض اعتصام النهضة، وقضى معظم المدة في السجن. كان بيعاني من تليف شديد في الكبد، وأسرته قدمت طلبات لنقله لمستشفى أو الإفراج الصحي، لكن اترفضت، توفى داخل سجن ليمان المنيا يوم 24 يونيو 2025 بعد تدهور حالته الصحية.

حازم فتحي، صاحب واقعة الشجار مع ضابط شرطة داخل سوبر ماركت في نجع حمادي اتقبض عليه في مارس 2025 واتحجز احتياطيًا على ذمة الواقعة. فضل محتجز في قسم شرطة نجع حمادي، وتوفى جوه القسم يوم 14 أغسطس 2025. الوفاة حصلت نتيجة سوء أوضاع الاحتجاز والتعذيب والإهمال الطبي.

مروة أشرف محمد محمد عرفة، مترجمة وناشطة حقوقية محبوسة بقالها أكتر من 5 سنين على ذمة قضايا أمن دولة. يوم 13 أغسطس 2025 أصيبت بجلطة في الشريان الرئوي، مع حرارة عالية وأنيميا وصعوبة في التنفس والحركة. حالتها اتدهورت واترفض نقلها لمستشفى متخصص

علي حسن عامر أبو طالب، 77 سنة كان إمام مسجد ومدرس بالمعاش محتجز سياسي في سجن وادي النطرون. حسب لجنة العدالة، سنه الكبير كان محتاج متابعة ورعاية طبية مستمرة، لكن إدارة السجن ماوفرتش الرعاية الكافية، حالته الصحية اتدهورت لحد ما توفى جوه السجن.

مهند أحمد عبد العظيم الفقي، 30 سنة من قرية تتا بالمنوفية اتقبض عليه نهاية يوليو 2025 واتعرض، للضرب والتعذيب داخل قسم شرطة منوف. اتنقل المستشفى وهو في حالة خطيرة، واتضح إصابته بارتشاح في المخ ونزيف داخلي واضطراب شديد في الوعي وتوفى يوم 25 أغسطس متأثرًا بإصاباته.

أحمد محمود محمد سعيد، 48 سنة من قرية ناهيا بالجيزة كان محتجز سياسي في سجن الجيزة العمومي. حسب لجنة العدالة، كان بيعاني من سرطان الغدة، وإدارة السجن رفضت نقله للعلاج الكيماوي وحالته اتدهورت لحد ما توفى جوه السجن يوم 8 نوفمبر 2025، بالإهمال الطبي.