رَهَفْ

قلت له: «طيب يا حج، أنا هاجي معاك لحد ما نوصل بيتك ونكلم الطوارئ». وفعلاً ركبت معاه، وكان شكله طيب أوي، هو والست اللي معاه. بس حفظت رقم العربية كويس بتاعه قبل ما أركب معاه، أهو احتياطي. والمرعب إنه بعد عشر دقايق أو ربع ساعة، الراجل ده دخل في الصحراء، وفعلاً كان فيه بيت. ده بجد! نزلت أنا والراجل العجوز والست اللي معاه، ودخلنا البيت. البيت عبارة عن دورين، واقف لوحده وسط الصحراء. النور في البيت ده كان ضعيف جدًا، شبه المعدوم. دخلنا وقعدت في الدور الأرضي، أنا والراجل العجوز ده والست. بعد شوية جابوا لنا أكل عبارة عن عيش وجبنة، وكمان جابوا لنا شاي. وبعد شوية، قلت للراجل العجوز: «ممكن تكلم لي الطوارئ؟» العجوز قالي: «كلمهم من عندك». قلت له: «أنا معنديش شبكة في التليفون». قالي: «دلوقتي بقى فيه شبكة». وفعلاً بصيت في التليفون، لقيت الشبكة رجعت. كلمت صاحب الشغل، وكمان مراتي وأولادي، وكلمت الطوارئ. وبعد التلات مكالمات دول، الشبكة اختفت من التليفون. حاولت أتحرك بالتليفون في كل مكان في البيت، مفيش شبكة نهائي، ومش عايزة ترجع.