راشـد

كيف اقول المحبّه رافقتها السلامه وفي حديث الطواري مثل غزوة مهنا ياهوى قلبي إللي عاش ذروة غرامه اقربي من حدود الوصل لين اتهنا اضحكي لـ المساء لين يتبدد ظلامه ولا يعكّر مزاجك كيف صرنا وكنا يوم شفتك تحبين المطر و الغمامه ودي ان المزون الغر تصبح وطنا عادي إليا تباهيتي بـ تاج الوسامه أنتي اجمل عنود مذيّره في زمنا حسنك إللي معيّشني بـ حسن الأقامه لين صرت أعتبر وجهك زبون المجنا لا انثنى عودك إللي كيف اقاوم قوامه لو يهب النسيم العذب قام يتثنا وقفتك بـ الشموخ و طلّتك بـ أبتسامه لو تقولين هذا الموت قلت اتمنا مبسم شفاك واضح من خلاف اللثامه بين غمّازتين الخد منا و منا ودي اعيش عمري بين حزن و ملامه ولا تطيح الدموع بـ كفك إللي محنا الهوى مستحيل إنه يغيّر نظامه لو جميع البشر قامو يصدون عنا خلّي العاذل إللي خيبته في كلامه وإضحكي ضحكة إللي وش على الناس منا لو نشوف المحبّه مثل يوم الرغامه نجعل الحب مجد و نصنع المجد حنا

سالبة عقلي كثر ما ضعت ما أدور دليله الدروب الي تودينيّ لك اسعى لين اجيها باقي من الليل ساعاتٍ دقايقها ثقيله كل لحظه تفرح العشّاق فالليل أخطفيها لو تقيّدنا الظروف الممكنه و المستحيله مستعدين نتحمل ضيمها و نعيش فيها أذبحيني بـ أي شكل يجوز لك و أيّة وسيله و أعتقيني من دموعٍ لا أبتدت كيف أنتهيها ؟ قبل تِحزن وجهك المملوح يا مملوح شيله أنتي دموعك قبل تنزل على الأرض افتديها القصيد الي يلامس خاطرك ما فيه حيله و الحروف الي تمادت فيك يا بخت أبجديها ضايعٍ من ضحكة المبسم ليا نفح الجديله ضيعة الي كل ما أنجز له مهمه يبتديها لدّي عيونك و ارحّب بالمراهيف الصقيله ليه تهجرني وانا الي مت منها مت فيها قولي أحبك , ترا أحبك مثل وجهك جميله حتى لو ما قد نطقتيها بساعدْك ، انطقيها من كثر ما أنتي حديثٍ لـ الليالي كل ليله الليال الي تسولف فيك ما شاء الله عليها

سواليفي عن الحب وعن الشوق وعن الاحساس وانا أبعد مايكون من العلاقات الغراميه ٰ صحيح اني حرامي يوم كنت اسرق قلوب الناس لكني تبت ، من يوم سرقت قلبي حراميه

أحن لكل ليله كنت فيها بين ذيك وذيك معك كانت حظوظ الساهرين أكبر من النيام أخليك . . الله يخليك ، من يقدر يخليك من يخاف الموادع لو يهوجس فيه ما ينلام عطيتك قلب كان المستحيل إنه يضحي فيك ومنحتك حب ما تمنحه الأحلام لـ هل الأحلام شعور الأحتياج أصعب أو اللهفه على غاليك ؟ يا صعب الفقد لا بانت علاماته مع الأيام خذت مني الليالي كل شي عاد أنت ما أوصيك خذ الباقي من آمال الحياه وعطني الأوهام تعبت من السهاد ومن تناهيدي على ماضيك لو تنام الجفون من التعب جفن الوله ما نام

ياشين طبعٍ فيك ، يازين الاطباع لولا الرجاء .. ماكان خليته يفوت

رسومٍ غدت بين العثامير حبة خال هذاك متعديها وذا قاصرٍ عنها لا مريتها والخاطر اضيق من الفنجال ما تلقى دموعي في يدي ما يزبنها تعرّت على مر السنين وصفقها الحال وعجاج الزمان يشيل منها ويدفنها طواها الغياب اللي يبيّح خفا الرجال على اقفاية اللي ما سمح خاطره منها ولا أشين من فراق الاحبه متى ما طال سوى جيّةٍ عقب البطا ما تعيّنها ولقيت البيوت اطلال و لا سكن عمال تقافوا عربها لين خليت مساكنها وهبّت هبوب الوجد من كل جال و جال ولا في يديك الا عسى الله يزيّنها هذا والله اللي حط بين الضلوع اخلال ليا عنت الذكرى القديمه لـ اماكنها لقينا من الدنيا وناسه وضيقة بال وحل ورحيلٍ في قساها وليّنها ظهور الليال اللي تخالف ظهور جمال يودع ويستقبل ظهرها ، وباطنها

لو ان العوض فيك المراقيب والأطلال تشيّمت من روس المراقيب بأكملها رسوم البطا ، ما تثّر الا على الرجال لا مر .. ولقى فيها بقايا من اهلها

انا ما معي حيله على الهجر يا راعيه لو أني اكابر معك تفضحني النبره تعب قلبي المسكين جاه الذي يكفيه تلذذ بـ طعناتك .. وهو ما معه دبره ترا اللي كتبته فيك .. والعالم تغنيّه جروحٍ بقت في داخل القلب منثبره

هذا يوم مولدك و لفاك القصيد أحزاب دخلتي العشرين تحت ضفّي و زنتي أحنك من الأيام و البرد و الملهاب و أعاملك بالحب الحقيقي مثل بنتي مصيري معاك و شبّ قلبي معاك و شاب على عرش قلبي والله إنك تهيمنتي دخلتي عليه من أصدق الحب والإعجاب و تربّعتي و شختي عليه و تمكّنتي تشين الظروف و تفجع الخايف المرتاب لك الله لو شانت ظروفي فلا شنتي تمر السنين و تجتول و القلوب تهاب و تبقين فـ العمر المحدّد مثل ما أنتي عزيزة نسب و أطهر من الدّين التواب رفيعة مقامٍ هان عمري ولا هنتي تمرّين و يصير السماء خيرها صباب و تزين الأراضي كل ما أنتي تزيّنتي حبيبة عيوني كل ما جيت لـ المحراب مع كل سجده خاشعه شفتك و بِنتي فداك الشعر والناس والحلم والاحباب و أنا ، والسنين المقبله ، وين ما كنتي

جميل الطاري العذري خذتني يمّك الاشواق وانا سلك الحرير يقودني صوبك على الطاري حنيني كل ماحل المساء يفحص لي الاخلاق يسرّيني على نار اشتياقي لك وانا داري متى نبدى نقدس حُبنا وانترجم الميثاق ونجعل كل ليله مقبلة ب الوصل سمّاري لاذعذع نودك ايعِيش الغصن واتنوّر الاوراق وتزهربي حياة كان يبني فوقها الذاري مراتعك القديمه جنّتي والبعد ما ينطاق تعال اسأل خفوقً كل ليله يسلب افكاري اذا في خاطرك ما يحيي الامال ف المشتاق تعجّل به قبل سيف التشتت يقطع اخباري نبى يحين اللقى ف ايامنا وافراق ماش فراق لين ان الوصل يشفي كل جرح فالهجر عاري عسانا كل ما خاب الرجاء واستحكم الغسّاق ايبشرنا سناء نورا تباشيره من الباري سمي الغنج يـ اجمل كل ماشفته على الاطلاق تداعى لك حنيني و القصيد بموقف اجباري يرجعني عليك النود ، والتذكار والبراق مثل ماحن من بعد البطى وارجع على داري عيوني عند غيرك ...كن صايبها عمى وارهاق وعندك كل حاجه فيك لازم تخطف انظاري عليك من الترف والحسن والمنطق مالذ ولاق وعوداً لاتخاطفه الهواء يخطف له ابهاري تراودني .. طيوفك شبه ليلي على الافاق اسامر وحشتك ب اشعوري الكامل وبشعاري اشوفك خير من حبه تمكن داخل الخفّاق واشوفك ملجئي ف اللافيات ومأمن اسراري بذلت التضحيات اللي تخلد لك ثمن واسياق على ميدان حبك والله ان ماكلّت امهاري حفظتك عن عيون العذل في قلبي وفالاحداق مثل حفظي لشيمة نفسي وحفظي لـ مقداري متى ما ظافتك لهفتك والنسري عليك انساق تذكر عاشق لامن لمحك ايفز و ايماري ما عشت الا على ساعة لقاك اللي لها تواق على رغم المسافه بيننا ماكثرة اعذاري حبيبي ون دعاك الشوق مادون الوصال ارواق وانا ماني بحاسب دون دارك بعد مشواري احبك ، ليت كل احبك نهاياتها بـعناق عساني ما عدمك ومن شفاك اخذ بثار

الليل دون الذكريات الماضيه فل الشراع ما يدري العاشق قديم الذكريات تألمه سور الغلا من دونه الاشواق والغيره دفاع جداره العاذل ما يقدر يعتليه بـ سلمه انا حريص ان المحبه سرها ماهو بـ يذاع لكن عيوني من يناظرها عليك تعلمه عليك بالي منتبّه يا ابو المضاليل الوساع وينك ترا عندي كلامٍ لا حضرت مولمه اكلم طيوفك لا مرتني بعد طول الضياع حتى الهوى لا هب من يمك بديت اكلمه سلمت قلبي لـ الوداع المر وجروح الوداع والله لو انه عند غيرك ، مستحيل يسلمه

بتحدك مقادير الدهر ، والليالي العوج على جمرةٍ .. مالك على لمسها حاجه

ضاق صدري من غثى الوقت عقب الاتساع جعل يسقى يوم عندي على الضيقه مدا الطواري تدمر الحال بعد الانقطاع اشهد ان ما عاد لي من طواريك مغدا ودي ابوج التخاتيخ واذب الرفاع واستعيد اللي لـ ماضيه واذكاره صدا يمكن القى جرعة امال وشعور اقتناع والعقل يسترجع الوعي والقلب يهدا لا متى وانا احسن الظن واحسن الاستماع والتمس لك عذر واعذرك واسجل فدا اعتذر ما عاد به عذر قدر المستطاع انت معك الصبر تعليقه وضيعت جدا ان قدرت ازيح عن عتمت الشك القناع ما قدرت ابدل الطيب الاول بـ الردى الهوى زهرة شبابه تنسيك الضياع ليتني ما طعت قلبي وجنبت القدا مايفيد اللي يحبون طول الاجتماع لازم يلبون يوم التفراق الندا كل يوم ارسم بروفه على هيئة وداع داري ان الحب تاليه فرقا وزهدا

خلاص ماعادني نفس النديم القديم وصلت لـ الحاله اللي ماتمنيتها من اربع سنين كني عايشٍ في جحيم كله من الصدمه اللي ما تخطيتها على رجا انسى الألم سويت حالي غشيم وسويت كل الامور اللي ما سويتها لكن لا زال فـي قلبي فراغٍ عظيم في سده .. العنكبوته بانيه بيتها قابلتها في زحام الشارع المستقيم ومديت كـفـي بـصـافـحها ورديتها ووقفت حاير تلاعبني هبوب النسيم وقلبي من الشوق يسحبها بجاكيتها من كثر ما حِبها متجذرٍ فالصميم كم ليلٍة قمت من نومي وناديتها يا ليتها ما تمادت بالنقاش العقيم وهي تدري اني ببكيها وبكينها مدري ورا الصدق طلعني بشكل اللئيم وانا اكثر انسان صادق يوم حبيتها من يوم خليتها وانا اشعر اني سقيم لو عاد فيّ الزمن ما كان خليتها ما بين قهر الرجال وبين كيد الحريم دنياي جادت بصبرتها وحلتيتها غنيت فيها قصيدٍ من سمع به يهيم ولا قدرت انشره .. خوفٍ على صيتها قد فر من ظلمة الادراج بيتٍ يتيم اهل المدينة .. تزين به حوانيتها

أعرف الهوى بين المسره وبين الجور وش اللي يجيبك في شروقه وفي غربه تزود المحبه وانت يا الخالي المعمور معك ما يخلي واسع الصدر في كربه أجاذب ظلامك آه لو لفني لك نور و اشاور ضميرك والعن الهم والغربه إذا مايزودك الوله في رجاي حضور أنا وين أودي قلبي أن تاه به دربه

يا مُعجبه .. مالي على الحب مشهاه انا ، المفارق ما يغيّر ولائي تردّني عن سيرة الحب واشياه قصّة ولائي ، شيمتي ، كبريائي حتى لو آنك بالجواهر محلاه لقاء غيري ما يشابه لقائي لا تحتويني .. قلبي اكفاه ما جاه انا بنفسي قانع من احتوائي الارتباط اللي يجي بـ المحاباه نهايته دمع وحزن لا نهائي ما فيه زي اللي رحل عني اشباه بعده رضيت اعيش شخص انطوائي توبه ما عاد اعطي شعوري من اقصاه كفيّت عنه .. ومكتفي بـ اكتفائي كتبت فيه من اندر الشعر واغلاه فـ النثر … ولا فالقصيد الغنائي امارس طقوس الكتابه لـ ذكراه شاعر كتب في كل حزن وروائي لولاه … ما كنت انتقائي ولولاه ما كنت حتى الان شخص انتقائي اعرف مكانه لو انا فيه م القاه لو كان خارج عن حدود انتمائي لـ الحين في ذاك المكان اتحراه هو الوحيد وبآقي الكون نآئي

حبيبي .. من يحبك يعيش العمر خواف يجي يوم من الايام ما كان حاسب له انا من بديت افقد من احساسك الانصاف لقيت العمر باهت .. والاحلام منذبله من اول كلامك كله ، من الالف للكاف شهاليل نوٍ .. نافر النبت من وبله من اللي معلمك القسى والكلام الجاف؟ بعد كنت ارقّ من النسانيس من قبله

تسلّلت بعد التجافي و الوداع ما باقي الا ترتمي من خوفها اتشوفني لـ ظروفها خطة دفاع واشوفها تملي علي شفوفها صحيح معها كانت الدنيا متاع بس المحبه غادرت بـ ظروفها اشد من نهش الضواري و السباع يوم اتهجى فـ الوداع حروفها المعذره إخت الهروب من الرضاع لو تختلف بـ أنواعها و وصوفها اميز الرغبه .. و اميز الاقتناع واعذار ليلى من خضاب كفوفها عرفت وش فرق الهيام من الضياع اشكر قساوتها على معروفها ما عاد لي في وصلها حب إطلاع الرحله هذي قدرت أطوفها الحاجه إللي ما تجي بـ الاندفاع تصنع إنك مكتفي و تشوفها

بسمتك يا مايس القد سراقة قلوب يسفهل القلب لامن سناها لاح له ابتسم ويرف براق في عرض النصوب له تساق الروح فـ الدرب سوق الراحله من شماليّ الجزيره ليا حد الجنوب مابقى وادي سناوي ولا ارضٍ قاحله الفياض الخاليه من منابيت العشوب والغصون اللي من اول يباس وناحله ارتوت ما كنها غير عودك ، والهبوب تطرقه بشويش وتداعبه وتساحله يا حبيبٍ شبّ في صدر من حبه شبوب كمّ قصيدٍ قد رقى له ، ودمعٍ طاح له قول احبك يزهر العمر وتهون الخطوب انت ريقك كنه الشهد من مناحله رحت عني وانت متكدر و وجهك شحوب والله ان ماني براضي ، ولا مرتاح له كنّ لونه مثل لون الشفق حزة غروب لا اختلط في زرقة البحر وادمى ساحله جيتك من البعد برضاي ماني بـ مغصوب قلبي اللي بين الاضلاع قال .. ارواح له بتبعك لو دونك التيه وطوال الدروب جعل رجّالٍ ما يتبعك يِكسر كاحله

سافري بي في عيون الكون ياذات الغرابه ولك علي ابقيك بالدنيا على الدنيا فريده مايخلي الشعر يفقد قيمته غير الرتابه لا فقد فكرة وحبكة شاعر ومطلع قصيده ابرقي ماكنك الا الموت بعيون الذيابه وارعدي ماكنك الا الخوف في قلب الطريده وبين حبر من وريد وبين حبر من كتابه استمدي قوتك من اثنين والرحله بعيده بين فوج وبين موج وليل نجومه تشابه ولا معي ياكود قلب جذوة احساسه وقيده فاقد راحة ضفاف وفاقد قبلة رحابه ولا أويت لصخرة يلقى بها الفاقد فقيده أدركيني بين فرط الجفوه وفرط الصبابه لين ما ابلغ مجمع البحرين والشعر استزيده وانشده وانا اتجرع مر صبري مع عتابه وبيني وبينه جدار الأجوبه عيا يشيده كيف يصنع من سبيب الخيل مجرور الربابه وكيف جلد الذيب يعزف للوتر صوت النشيده والغصون الخضر منها تصنع رماح الحرابه كيف والتابوت من جذع الشجر والموت بيده كل ضربة فاس ، توجع جذع وتبيح صوابه يوجعه غدر الخشب مايوجعه حد الحديده