عسى مضاريب القصيد اللي تقلط فالنحور
فدا العنود اللي يحق لها التغنّج و الدلع
فيها من الصيّب ليا من صبّه الوسم البكور
و الريم لا منّه جفل— و الطير لا منّه شلع
خلوني الاعب مفاتنها قدى ولا دبور
و أعيش عيشة مستهيم إذا طفى و إذا ولع
دخلتي عليه من أصدق الحب والإعجاب
وتربعتي وشـختي عليه .. و تمكنتي
تخون الرجال الموقف الصادق الغصاب
و على عزك بمجدٍ زهيتيه ما خنتي
تشين الظروف وتفجع الخايف المرتاب
لك الله لو شانت ظروفي! فلا شنتي
تمر السنين و تجتول و القلوب تهاب
وتبقين فـ العمر المحدد مثل ما انتي
فهد آل صبيح
فارعٍ فيها من الحسن ما لذ وطاب
يتزين في مظـاليلها الخرس الكحل
فكّت أبواب المحبه بـ قلبي باب باب
وجيشها اجتاح المحاني وسيطر وأستحل
تابعً جرّة هواها مثل تبع السراب
هو يحل اتبع هوى الغيد ولا ما يحل؟
سلمهي لي وأبشري والله بـ رد الجواب
أنتي عيونك قصيدة وأنا شاعر فحل
محمد العذبه
أمرّك و أنا مستبعدٍ فكرة المعواد
و يغلب علي وجه الشبه بينك و بينه
يا غاية مراد اللي يشوفك أحق مراد
و الأحق في بسمة شفاته و ماء عينه
ملكني غرامك لين صرت أملك أستعداد
أناصر ضحايا الحب و أفهم مجانينه
« من حبها كنّ ما خلق غيري على الدنيا شجاع
لو دربها جمرة وطتها الرجل ما حسبتها
أسوق عمري في رجاها لو تعشاني السباع
أهم شي أشوف شارعها، ولفة بيتها
إن كان حي صار ضيعه قلت يا حلو الضياع
لا والله إلا ضاعوا العالم — وأنا دليتها »
حمد المري
حبيبي جعل باقي للسنين
الماضية معواد
لو انها فكرةٍ في حاضرك ماهيب مطروقه
إذا انّه يزعجك بيت القصيد
الدارج المعتاد
أنا أكثر من يشوف إن الشعر حقٍ من حقوقه
خذ اللي ودك انك تاخذه ،،
وأنا على إستعداد
أجيب الضحكة اللي من يدين الحزن مسروقه
الشفايا والعيون وشعرك المنسابي
والنحر تتعب فنون الوصف ما صورته
كل ما وجّهت يمي جيت لك متصابي
وكل ما قفيت مني خافقي طيّرته
بس أبيك أن غبت عن عينك تحفظ غيابي
شـوفني شي تمنيته ولا حضرته
مثّل ماشوفك تجي بين الجسد وثيـابي
في ثيابي شوف وشلون الجسد خاشرته . .
جعل عذبات القصايد مداوية الكبود
فدوة الرمش الجري و الحجاج المنتبه
أحفظي مبخوت الأبيات في طابوق عود
و لا خلّيها على الصدر سلسال رقبة
أعشقك و أدرى خطاويك من هرج النقود
و الطريق الملتوي و الكلام المشتبه
جعل دارٍ فيه طرياك حنّان الرعود
الربيع يفاوله و السحايب تسكبه
منيف الجراش
انا بليا شوفتك شخص أعمى
إلى متى وأنا عليك أتحايل
مايكفي إنّي لاغيٍ كل الأسماء
ومشطّب الأرقام وأغلى الرسايل ؟
أنا أعرف إنّك فوق ذا الناس وأسمى
لكن أنت قاطعني بشتّى الوسايل
أوقّف لطاريك وأشوش وأحمى
حميّة يضرب عليها المثايل
تراني أعتبرك مثل شربة الماء
ماهي تعوضها جميع السوايل
أوروبية المظهر —عريبيّة المنطوق
على سلب لُبْ القلب ,, من كانوا أعوانك ؟
خدمك الجمال وغرّك العاتق المنتوق
تشوف الكلام إسراف والناس عدوانك
عسى كل قاف يمرني مرّت المسروق
فدا كل حرف أبجد تقوله على لسانك
مايشبهك فالأرض الفسيحه ولا مخلوق
ولا أظن منّك أشباه حتى من أخوانك
أبو عودٍ لو يتوب الهوى عن الهوى / ما تبت
من مجاذب ثماريه المراديم و مواريقه
ياكثر الرزق في وجهه وكثر الما و كثر النبت
ويا كثر القلوب المرجهنّة في صناديقه
صدفته في دروب العابرين و رحت له ما هبت
واخذته من عشاشيق الزمان و من مطاليقه . .