Madhur Misal

राष्ट्रवादी काँग्रेस पक्षाच्या वतीनं मुंबईत 'अभिजात मराठी भाषा दिन गौरव सोहळा २०२५' मोठ्या दिमाखदार आणि उत्साहाच्या वातावरणात पार पडला. या सोहळ्यात पद्मभूषण मा. डॉ. राम सुतार, पद्मश्री मा. श्री. मधु मंगेश कर्णिक, पद्मश्री आणि महाराष्ट्र भूषण मा. श्री. अशोक सराफ, मा. श्री. दिलीप वेंगसरकर, श्री. सयाजी शिंदे, श्रीमती वैशाली सामंत आणि मा. श्री. इंद्रनील चितळे यांना मराठी भाषेच्या वृद्धी आणि संवर्धनासाठी आपापल्या क्षेत्रातून दिलेल्या योगदानाबद्दल गौरविण्यात आलं. यावेळी पुरस्कारप्राप्त मान्यवरांचे मनःपूर्वक अभिनंदन करत उपस्थितांशी मनमोकळा संवाद साधला. सर्वप्रथम सर्वांना महाशिवरात्रीच्या हार्दिक शुभेच्छा दिल्या. ‘मराठी भाषा गौरव दिन’ हा कविश्रेष्ठ कुसुमाग्रज यांच्या जन्मदिनी साजरा केला जातो. त्यांच्या काव्यप्रतिभेने मराठी भाषा अधिक समृद्ध झाली असून, त्यांनी आपल्या अलौकिक प्रतिभेच्या माध्यमातून मराठी साहित्याला नवे अलंकार चढवले आणि अनेक अमूल्य साहित्यकृतींची निर्मिती केली. ते मानवतेचे कवी होते, त्यांनी आपल्या साहित्यातून समाजाच्या विविध अंगांना स्पर्श केला. त्यांच्या पश्चात आता मराठी भाषेच्या संवर्धनाची जबाबदारी प्रत्येक मराठी भाषिकाने आपल्या खांद्यावर घ्यावी, असं आवाहन केलं. महाराष्ट्रात मराठी भाषेच्या माध्यमातून स्वराज्य, स्वसंस्कृती आणि स्वचेतनेचा विस्तार घडून आला आहे. राज्यातील महिला सशक्तीकरण, औद्योगिक प्रगती, कृषी विकास आणि सामाजिक परिवर्तन यांसाठी मराठी भाषेनं महत्त्वाची भूमिका बजावली आहे. राज्य शासनाकडून मराठी भाषेच्या संवर्धनासाठी आवश्यक असलेल्या निधीची कमतरता पडू दिली जाणार नाही. साहित्य प्रसार, भाषा विकास आणि संशोधनाला चालना देण्यासाठी तसंच साहित्यिकांना प्रोत्साहन देण्यासाठी जागतिक दर्जाचं मराठी भाषा भवन मुंबईत साकारलं जात आहे. हे भवन महाराष्ट्राच्या सांस्कृतिक अस्मितेचं प्रतीक ठरेल. मराठी भाषा संपूर्ण जगभर पोहोचावी, हे आमचं ध्येय असून, प्रयत्नशीलतेच्या जोरावरच हे स्वप्न साकार करू, असा विश्वास दिला. राष्ट्रवादी काँग्रेस पक्ष हा शिव, शाहू, फुले, आंबेडकर यांच्या विचारधारेवर आणि महाराष्ट्राचे माजी मुख्यमंत्री यशवंतराव चव्हाण यांच्या आदर्शांवर चालत जनसेवेच्या कार्यात सातत्यानं योगदान देत आहे आणि पुढेही देत राहील.

आदरणीय श्री. शरद पवार साहेबांना वाढदिवसाच्या मनःपूर्वक शुभेच्छा! आपणांस उत्तम स्वास्थ्य व दीर्घायुष्य लाभो, ही सदिच्छा.

महाराष्ट्राचे माजी राज्यपाल श्री. एस. एम. कृष्णा यांच्या निधनानं राजकारण, समाजकारण, शैक्षणिक, न्यायिक क्षेत्रातील दिग्गज, मार्गदर्शक व्यक्तिमत्त्व आपण गमावलं आहे. महाराष्ट्राचे माजी राज्यपाल म्हणून त्यांचा राजकीय, प्रशासकीय अनुभव दांडगा राहिला. त्यांनी कर्नाटकचे मुख्यमंत्री, केंद्रीय मंत्री, राज्यपाल, विधानसभा अध्यक्ष, उपमुख्यमंत्री अशी महत्त्वाची सार्वजनिक पदं भूषवली. या पदांवरून काम करताना त्यांनी नेहमीच लोकहित जपण्याचा प्रयत्न केला. पायाभूत सुविधांचा विकास, शैक्षणिक गुणवत्तेत वाढ, आंतरराष्ट्रीय संबंधांमध्ये सुधारणा आदी बाबतीतील त्यांचं कार्य कायम स्मरणात राहील. मी श्री. एस. एम. कृष्णा यांना भावपूर्ण श्रद्धांजली अर्पण करतो. त्यांचं निधन हे त्यांच्या परिवारासाठी मोठा धक्का आहे. हे दुःख पचवण्याची शक्ती त्यांच्या कुटुंबियांना मिळो, अशी प्रार्थना करतो. त्यांच्या कुटुंबियांच्या आणि आप्तस्वकीयांच्या दुःखात आम्ही सहभागी आहोत.