AI SHOW PU

أمس صار لي حادث وانا امشي ١٢٠ في يوم جمعة هادي توني طالع من عند امي وكنت على الدائري الشمالي بروح لشقراء، واخوي الصغير يسولف عن حادث صار له وكيف انه كان فجأة، كان قدامي تورس أجدد موديل سودا وقرر أنه يوقف بأقوى ما عنده ( جا في حضني تقريباً- كنت حاط مسافة آمنة لكن "لا يغني حذر من قدر")، قلت لاخوي: يعني مثل هذا الحادث؟ ولفيت يمين… وهنا هجت السيارة (اول مره افحط بدون قصد) واروح بالسيارة يمين ويسار ويمين وخذيت دوران للخلف والسيارات يميني ويساري يمشون اقل شي ١٠٠ ويتفادوني…اول ما بدت احداث الحادث حسيت انكب علي مويه ودخلت في حلم وكن اللي قدامي مب حقيقة… وثم صرت عاكس السير وصدمت في سيارة سواق محترم، والحمد وقتها السيارة كانت راحت سرعتها فجت الصدمة خفيفة على كفري وعلى بابه، وسلمنا كلنا الحمد لله… والضحك ان السواق مقتنع اني كنت افحط، يبن الحلال افحط في الدايري وقت الزحمة وبعد الجمعة؟ وش المسكة ذي، وبعدين وجهي يوحي بأني مفحط؟😂، المهم الحمد لله سبحانه جت سهالات وزينت السيارة ورحت لشقراء وكانت فيه عزيمة للعائلة واستانست😂 والله يبعد عنا وعنكم كل شر ❤️ وشكراً لرجال المرور الرائعين على تنظيم الأمور بعد الحادث الصراحة ما قصروا الله يبيض وجيههم❤️