گورنر راج اور ایمرجنسی کے نفاذ کے بعد صوبائی، ریجنل اور ضلعی تنظیموں، انصاف لائرز فورم، اراکینِ اسمبلی اور کارکنوں سے مشاورت میں آئندہ سیاسی لائحۂ عمل کے بارے میں اہم سوالات اور تجاویز سامنے آئیں۔ ان باتوں سے کارکنوں کو آگاہ کرنا ضروری سمجھتا ہوں تاکہ انہیں صورتحال، کیے گئے فیصلوں اور ان کی وجوہات کی وضاحت مل سکے۔ اس مشاورت میں فوری احتجاج کے بجائے مناسب وقت اور حکمتِ عملی کے تحت فیصلہ کرنے کو ترجیح دی گئی۔ مقصد کارکنوں کو مزید گرفتاریوں اور تشدد سے محفوظ رکھنا اور اشتعال انگیزی یا ایسے واقعات سے کارکنان اور پارٹی کو محفوظ رکھنا تھا جنہیں غلط رنگ دے کر ذمہ داری کارکنوں پر ڈالی جا سکتی تھی۔ ضلع خیبر کے باڑہ بازار کے واقعات اس حکمتِ عملی کی اہمیت واضح کرتے ہیں۔ ان حالات کے پیشِ نظر جن کارکنوں اور اراکینِ اسمبلی نے اپنے حلقوں میں احتجاج کے لیے رابطہ کیا، انہیں پارٹی کے احکام کا انتظار اور فوری رد عمل دکھانے سے گریز کرنے کا مشورہ دیا گیا۔ کارکنوں کی حفاظت ہماری ذمہ داری ہے۔ فوری احتجاج کی کال نہ دینے کا مطلب سیاسی جدوجہد سے دستبرداری نہیں۔پُرامن احتجاج ہمارا حق ہے، لیکن اس کے وقت اور نوعیت کا فیصلہ قومی سطح پر مشترکہ حکمتِ عملی کے تحت ہونا چاہیے۔ باضابطہ پروگرام کے اعلان تک غیر منظم اور انفرادی احتجاج سے گریز کرنے کا فیصلہ کیا گیا ۔ گورنر راج اور ایمرجنسی صرف خیبر پختونخوا کا نہیں بلکہ پورے ملک کے آئینی اور جمہوری نظام کا مسئلہ ہے۔ اس لیے قومی سطح پر پُرامن اور منظم جدوجہد ضروری ہے۔ ہمارے مقاصد واضح ہیں: عمران خان اور تمام سیاسی قیدیوں کی رہائی، گورنر راج اور ایمرجنسی کا خاتمہ، منتخب صوبائی حکومت کی بحالی، آئینی حقوق اور عوامی مینڈیٹ کا تحفظ، خیبر پختونخوا کے قدرتی وسائل اور معدنیات پر حقِ ملکیت اور جائز حصے کا تحفظ، آبی وسائل پر صوبے کے حقوق اور وفاق کے ذمے مالی واجبات کی ادائیگی۔ مرکزی قیادت مشترکہ آئینی اور جمہوری مقاصد کے لیے دیگر سیاسی جماعتوں سے رابطے میں ہے۔ اس مشاورت کی روشنی میں صوبائی تنظیم کی رائے ہے کہ جلد از جلد ہم خیال سیاسی جماعتوں کی قومی آل پارٹیز کانفرنس بلائی جائے،خصوصاً ان جماعتوں کو شامل کیا جائے جو دہشت گردی کے خلاف ہیں لیکن اس کی آڑ میں عوام کی منتخب حکومت اور جمہوری مینڈیٹ چھیننے کی مخالفت کرتی ہیں۔ کانفرنس میں مشترکہ مؤقف اور متفقہ سیاسی و آئینی لائحۂ عمل طے کیا جائے۔ اس دوران قانونی اور پارلیمانی اقدامات، سیاسی جماعتوں، وکلا، پیشہ ورانہ تنظیموں اور سول سوسائٹی سے رابطوں اور میڈیا و متعلقہ بین الاقوامی فورمز پر آئینی و انسانی حقوق کے مسائل اٹھانے کی ضرورت ہے۔ دیگر صوبوں کی پارٹی قیادت اور تنظیموں کا فعال کردار بھی ضروری ہے۔ خیبر پختونخوا کی صوبائی تنظیم سمجھتی ہے کہ مرکزی قیادت کو نومبر 2026 کے پہلے ہفتے کے اختتام تک آئندہ قومی لائحۂ عمل کے بارے میں واضح سیاسی ہدایات دینی چاہییں، جن میں سیاسی، قانونی، پارلیمانی اور عوامی سرگرمیوں کی ترجیحات طے ہوں۔ اگر موجودہ اقدامات اور عوام کے حقوق کی خلاف ورزیاں جاری رہیں تو بڑھتی ہوئی عوامی بے چینی کے نتیجے میں خیبر پختونخوا بھر میں سیاسی وابستگیوں سے بالاتر ہو کر وسیع پیمانے پر پُرامن تحریک سامنے آۓ گی۔ ضروری ہے کہ عوام کا حقِ حکمرانی بحال کیا جائے، ان کی منتخب حکومت واپس لائی جائے اور ان کے آئینی و جمہوری حقوق کا احترام کیا جائے۔