Shaheer Akram

زندگی میں ہر بات کو دل پر لینے اور ہر رویّے کو اپنی ذات سے جوڑنے کے بجائے وسعتِ قلبی سے کام لیجیے۔ کبھی لوگ اپنے اندر کی پریشانیوں، دکھوں اور آزمائشوں کے بوجھ تلے دبے ہوتے ہیں، اسی لیے ان کا رویّہ بدل جاتا ہے۔ لوگوں کے حالات کو سمجھنے کی کوشش کریں، ان کی جگہ خود کو رکھ کر سوچیں اور اگر ان کے احساسات کو سمجھ نہ سکیں تو کم از کم اپنے الفاظ اور رویّے سے انہیں تکلیف نہ پہنچائیں۔ نرمی، درگزر اور احساسِ انسانیت ہی پُرسکون زندگی کا اصل راز ہیں۔

جب دل یقین سے کہتا ہے کہ میرا رب نہایت مہربان اور محبت فرمانے والا ہے، تو پھر کوئی خوف، کوئی پریشانی اور کوئی آزمائش انسان کے حوصلے نہیں توڑ سکتی۔ یاد رکھیے! ہمارا رب ہماری خاموش دعاؤں، ان کہے دکھوں اور دل کی ہر کیفیت سے واقف ہے۔ بس اُس پر بھروسا رکھیے، وہ وہاں سے رحمت کے دروازے کھول دیتا ہے جہاں سے گمان بھی نہیں ہوتا۔ اللہ تعالیٰ ہمارے دلوں کو سکون، زندگیوں کو برکت اور ہر آنے والے دن کو خیر و عافیت سے بھر دے۔ آمین

رسول اللہ ﷺ نے فرمایا: "جو شخص نرمی سے محروم کر دیا گیا، وہ ہر قسم کی بھلائی (خیر) سے محروم کر دیا گیاـ" (صحیح مسلم) دل کی نرمی اللہ کا وہ خاص تحفہ ہے جو انسان کو خالق کے سامنے عاجز اور مخلوق کے لیے شفیق بناتا ہےـ اپنے لہجوں اور معاملات میں نرمی لائیے، کیونکہ سخت دل انسان بھلائی اور برکت کی خوشبو سے بھی محروم رہ جاتا ہےـ