🇵🇰 Sohail Ahmed Ch 🇵🇰

شفقت مسعود کو صرف عمران خان کے ایک پُرجوش حامی کے طور پر متعارف کرانا شاید ان کے سیاسی کردار کو بہت مختصر کردینا ہوگا۔ ان کی اصل شناخت اُس ڈیجیٹل مزاحمت سے بنی جس میں سوشل میڈیا محض تفریح یا سیاسی نعرے بازی کا ذریعہ نہیں بلکہ ریاست، طاقت اور آئینی حدود پر سوال اٹھانے کا میدان بن گیا۔ ان کا بنیادی مقدمہ بظاہر خاصا سادہ ہے: ریاست سے محبت اور ریاست کے طاقتور ادارے (فوج) سے اختلاف ایک دوسرے کی ضد نہیں۔ فوج ملک کے دفاع کا ادارہ ہے، ملک کی سیاسی تقدیر کا مالک نہیں؛ عوام اپنے نمائندے خود منتخب کریں اور طاقت کے مراکز آئین کی مقرر کردہ حدود میں واپس جائیں۔ ان کی حالیہ پوسٹس اور ان کے حق میں چلنے والی مہم بھی انہیں عمران خان کے حامی اور سیاسی و عسکری طاقت کے موجودہ سیٹ اپ کے ناقد کے طور پر پیش کرتی ہے۔ دلچسپ بات یہ ہے کہ شفقت مسعود اور ریاست کا یہ تصادم آج پیدا نہیں ہوا۔ اپریل 2022 میں، عمران خان کی حکومت ختم ہونے کے صرف چند دن بعد، شفقت مسعود FIA کی حراست میں تھے۔ اس وقت FIA کے تفتیشی افسر نے لاہور کی عدالت میں الزام لگایا کہ وہ فوج اور اُس وقت کے آرمی چیف جنرل قمر جاوید باجوہ کے خلاف derogatory tweets شیئر کرنے میں ملوث تھے۔ FIA نے ان کے فون لیپ ٹاپ وغیرہ کی برآمدگی کے لیے چودہ دن کا جسمانی ریمانڈ مانگا؛ مجسٹریٹ نے دو دن کا ریمانڈ دیا۔ یہ تاریخ اس لیے اہم ہے کہ 10 اپریل 2022 عمران خان کی اقتدار سے رخصتی کا دن تھا اور چند ہی دن بعد 13 اپریل کو شفقت مسعود عدالت میں کھڑے تھے۔ یعنی پاکستان میں جس anti-establishment سوشل میڈیا نے بعد میں ایک بہت بڑے سیاسی رجحان کی شکل اختیار کی، شفقت مسعود اس کے ابتدائی گرفتار ہونے والے چہروں میں شامل تھے۔ Dawn نے اس وقت رپورٹ کیا تھا کہ صرف وہ نہیں بلکہ پنجاب کے مختلف علاقوں سے متعدد افراد اسی crackdown میں گرفتار کیے گئے تھے۔ اس وقت ایک اور چیز ہوئی جسے آج یاد کرنا خاصا معنی خیز ہے۔ Human Rights Commission of Pakistan @HRCPakistan نے انہی گرفتاریوں کی مذمت کی تھی اور کہا تھا کہ سیاسی وابستگی خواہ کچھ بھی ہو، شہریوں کو آزادیٔ اظہار و رائے کا حق حاصل ہے۔ چار سال بعد نام پھر وہی ہے، سوال بھی تقریباً وہی اور تنازع کا مرکز بھی وہی۔ اس وقت سوشل میڈیا پر #شفقت_مسعود_کو_رہا_کرو کے تحت دعویٰ کیا جارہا ہے کہ انہیں حراست میں لیا گیا اور فوجی عدالت میں پیش کیا گیا ہے۔ یہ دعویٰ تیزی سے پھیلا ہے، حتیٰ کہ شہباز گل سمیت نمایاں PTI حامی اکاؤنٹس نے بھی ان کے لیے آواز اٹھائی ہے، لیکن اس موجودہ کارروائی کی مکمل قانونی تفصیلات کسی سرکاری یا پرائیویٹ میڈیا سے منسلک صحافتی طبقے سے نہیں ملیں؛ یعنی فوج کا ارادہ ہے کہ ابھی اُنھیں عدالت میں پیش نہ کیا جائے۔ شفقت مسعود کے معاملے میں مجھے ایک چیز زیادہ دلچسپ لگتی ہے۔ پاکستان کی پرانی سیاسی مزاحمت جلسہ گاہ، اخبار، پمفلٹ اور جیل کے درمیان سفر کرتی تھی۔ نئی مزاحمت کا ایک حصہ موبائل فون کی چند انچ کی اسکرین میں منتقل ہوگیا ہے۔ چنانچہ اب سیاسی کارکن کے پاس چھاپہ خانہ نہیں، X account ہے؛ پمفلٹ نہیں، پوسٹ ہے؛ اور بعض اوقات ریاست کو مطلوب "ثبوت" بھی کسی صندوق سے نہیں بلکہ اسی کے موبائل فون سے تلاش کیا جاتا ہے۔ 2022 میں شفقت مسعود کے جسمانی ریمانڈ کی درخواست میں FIA کا ان کے digital media equipment کی recovery مانگنا اسی تبدیلی کی ایک چھوٹی مگر علامتی مثال تھی۔ اسی لیے شفقت مسعود کی کہانی محض ایک شخص کی گرفتاری کی کہانی نہیں بنتی۔ یہ گزشتہ چند برسوں میں پاکستان میں پیدا ہونے والے اُس سیاسی کارکن کی کہانی بھی ہے جس کا ہتھیار بندوق نہیں، بیانیہ ہے؛ جس کا مورچہ پہاڑ نہیں، ٹائم لائن ہے؛ اور جس کے گھر سے ریاست کو گولہ بارود نہیں، موبائل فون برآمد کرنا ہوتا ہے۔ شاید اسی لیے اس کہانی کا سب سے دلچسپ سوال یہ نہیں کہ شفقت مسعود کون ہیں؟ سوال یہ ہے کہ ایک ہارڈسٹیٹ اپنے شہری کے موبائل فون سے اتنا خوف زدہ کیوں ہے ؟ کیا واقعی ایک ٹویٹ اِس قدر اہمیت رکھتا ہے ؟ @shafqatmm1