Independent Thoughts

کیا ہم جذبات کی زیادتی اور برداشت کی کمی کے سبب سوچنے سمجھنے کی صلاحیت بھی کھو بیٹھے ہیں؟ @shehzad89 سے شدید اختلافات ہیں، مگر کیا ہمیں پاکستان اور امریکہ میں سینٹ کے انتخابات کے فرق کا علم نہیں؟ آخری دفعہ پاکستان میں کسی اقلیتی فرقے سے تعلق رکھنے والے نے عام انتخابات میں کب کھل کر مہم چلائی؟ کب ایسے شخص کو عوامی جلسوں میں پاکستان کی مذہبی اکثریت کے سامنے اپنے عقیدے پر فخر کے اظہار کا موقع اور عوام کی طرف سے پذیرائی ملی؟ اور کب عوامی اکثریت نے بالکل مختلف مذہب والے کو جتوا کر پارلیمنٹ میں بٹھایا؟ طرفہ تماشا یہ کہ الیکشن مہم کی جتنی آزادی عبدل السید کو امریکہ میں ملی، اتنی آزادی تو پاکستان میں کسی مسلمان کو بھی اپنی انتخابی مہم چلانے کی نہیں ملتی۔ الٹا غلطی سے کوئی ایسا بیان منہ سے نکل جائے جو عوام کو عقیدے کی بنیاد پر پسند نہ ہو تو لوگوں کو کلمہ پڑھ کر اپنے ایمان کا اظہار کرنا پڑتا ہے۔ چلیں ہم یہ کہہ لیں کہ پاکستان کے سیاسی و معاشی حالات مختلف ہیں لہذا یہ تقابل غیر ضروری ہے، یا کوئی اور دلیل تراش لیں۔ لیکن جواب میں غیر مسلم پاکستانی سینٹرز کے نام اٹھا کر جن کا انتخاب براہ راست ہوا ہی نہیں، کیا ثابت کرنا چاہتے ہیں؟ ہم خود سے جھوٹ بول کر آخر کیا حاصل کرنا چاہتے ہیں؟ اور کچھ نہیں تو اپنا آئین پڑھ لیں۔ یہی معاملہ پچھلے دنوں ایک صفائی کرنے والے کے بیان کے ساتھ درپیش ہوا۔ وہ کم تعلیم یافتہ، غریب شخص تنخواہ نہ ملنے اور معاشرے میں عزت نہ ہونے کی بات کر رہا تھا لیکن ہم نے طعنہ زنی کا کوئی موقع ہاتھ سے نہ جانے دیا۔ اس سے پہلے ایک سیاستدان کے بیان پر بھی یہ ہوا، جب اس کا مقصد کسی بیماری کی تذلیل نہیں بلکہ کسی دوسرے موقف کا اظہار مقصد تھا، یہ الگ بات کہ دوسرا موقف بھی غلط تھا۔ برداشت نہ ہو تو انسان کوئی درست فیصلہ کرنا تو دور معاملہ ہی نہیں سمجھ پاتا۔ ہم کب تک اس اجتماعی بیماری کا شکار رہیں گے؟ 80 سال اسی طرح گزر چکے ہیں اور کتنی دہائیاں ایسے ہی گزارنی ہیں؟