SAMH ⚛️🎊⚽️🇪🇬

هي دي أكتر فترة من سنين عايش فيها نوستالچيا جيل 2005، وده وصلني لقناعة إن جزء كبير من حظي في كرة القدم إني عاصرت أسطورة تريكة في الملعب. وبحس إن كلمة «نجم» دلوقتي بقت سهلة أوي تتقال على أي لاعب في مصر، بس أنا اتفرجت في الملعب على النجم اللي بجد، أصل اللي شاف غير اللي سمع. تريكة ده كان بالنسبالنا كده زي الـSuperheroes بتوع أفلام Marvel. ده البطل الخارق اللي وقت ما الدراما تتصاعد وتحس إن مفيش أمل، هيظهر لك من العدم حرفيًا عشان يغيّر كل حاجة. حتى هدفه الأول مع الأهلي في شباك الزمالك، وإحنا في وسط إحباط السنين العجاف، في ماتش الدور التاني في دوري 2004، واللي خسرناه 2–1.. جرية تريكة بعد الهدف وهو بيجيب الكورة من الشبكة وبيرجع لنص الملعب، والإصرار اللي كان على ملامحه، ده ما كانش واحد عايز يغيّر نتيجة ماتش.. لا لا لا، ده كان عارف إنه هيغيّر السنين اللي جاية كلها. في صفاقس، بيترسم الأهلي را كع لملك صفاقس، والاحتفالات كانت بدأت في ملعب رادس، بس كان فيه قرار من لاعب اسمه محمد أبو تريكة إنه يحوّل الاحتفالات دي لأصعب ذكرى في تاريخ كل من تجرّأ على رسم الأهلي بالصورة دي. الملعب المالي بيسجل فينا هدف على ملعبنا في دوري أبطال إفريقيا 2012. الأهلي برّه البطولة خلاص، ومحتاجين نسجل 3 أهداف، وتريكة على الدكة درجة حرارته 40، والجهاز الطبي قال مش هينفع يشارك بسبب حالته الصحية، ومتعرفش ولا تفهم ليه وإزاي دخل القايمة أصلًا وهو بالحالة دي. بس تريكة بينزل يعمل كل حاجة في الكورة، ويسجل الهاتريك، والأهلي يصعد. مش بقولك يا جدع، ولا بطل أفلام Marvel! عارف يعني إيه فيه لاعب في ليالي الديربي مساهم في 21 هدف؟ سجل 13 وصنع 8 أهداف. عارف إنه لعب 6 ماتشات قدام الزمالك في دوري أبطال إفريقيا، وساهم في 7 أهداف في الـ6 ماتشات؟ مفيش ماتش ما سابش فيه علامة؛ سجل 4 أهداف وصنع 3. القصة مش أرقام، ولا إنه أكتر لاعب في تاريخ إفريقيا حصل على جائزة أفضل لاعب داخل القارة 4 مرات: 2006، 2008، 2012، 2013. القصة حواديت وحكاية من اللي قالت عنها أم كلثوم: «كان لك معايا أجمل حكاية في العمر كله». دي الحدوتة وصلت من جنونها إنه، وهو في آخر موسم له في الملاعب وبيعتزل، كان بيحقق جائزة أفضل لاعب داخل القارة في 2013، وبيكون بطل التتويج بإفريقيا على حساب أورلاندو بايرتس.. ما هي دي الفكرة، بطل الفيلم لازم السينما تقوم تسقف له في المشهد الأخير. تريكة موهبة جت لنا في وقت كنا تهنا فيه واتهزّينا، جه عشان موهبته تصنع حقبة تاريخية كانت وبا ل على المنافسين، وكان فيها مجرد النجاة من ماتش فيه تريكة من المستحيلات. حدوتة تريكة هي حدوتة مجانين كرة القدم، وهرجع وأقولك تاني: اللي عاشوا ذكرياتها غير اللي سمعوا عنها. كل سنة وإنت طيب يا ماجيكو 22 ❤️ 🦅