Sheikh Saba

متحدہ مجلس علماء کا وقف بورڈ کی جانب سے جمعہ کے خطبات مقرر کرنے کی کسی بھی کوشش کو مسترد کرنے کا اعلان متحدہ مجلس علماء جموں و کشمیر جو جموں و کشمیر کی سرکردہ دینی، سماجی اور مذہبی تنظیموں کا ایک مشترکہ پلیٹ فارم ہے اور جس کی سربراہی میرواعظ کشمیر ڈاکٹر مولوی محمد عمر فاروق کر رہے ہیں، نے وقف بورڈ کی جانب سے جمعہ کے روز مساجد میں یکساں خطبہ دینے سے متعلق سامنے آنے والی اطلاعات کا سنجیدہ نوٹس لیا ہے۔ متحدہ مجلس علماء نے کہا کہ یہ تجویز بھی مضحکہ خیز ہے کہ کوئی قانونی و انتظامی ادارہ اس بات کا تعین کرے یا اسے منضبط کرنے کی کوشش کرے کہ مساجد کے منبرو محراب سے کیا وعظ و نصیحت کی جائے گی۔ جموں و کشمیر کے مسلمان ایسی کسی بھی کوشش کو ہرگز قبول نہیں کریں گے۔ مجلس نے کہا کہ منبر ایک امانت ہے اور دینی رہنمائی علمائے کرام، ائمہ مساجد اور مسلمہ دینی اداروں کا دائرۂ کار ہے، جو اسلامی علوم، علمی روایت اور مختلف مکاتبِ فکر کی مستند تعلیمات سے جڑا ہوا ہے۔ ریاست یا حکومت اپنے طور پر یہ اختیار نہیں لے سکتی کہ وہ دینی خطابات کے موضوعات کا تعین کرے، خطبات کے لیے پہلے سے تحریر شدہ تقاریر مقرر یا خطیب کرے یا مذہبی عقائد اور عبادات کے معاملات میں مداخلت کرے۔ مجلس نے کہا کہ علمائے کرام اور دینی تنظیموں کا معاشرے کے مشترکہ دینی و سماجی مسائل کے حل کے لیے باہمی رضامندی سے جمع ہونا، مشاورت کرنا اور ان مسائل سے نمٹنے کے لیے کوئی لائحۂ عمل اختیار کرنا ایک الگ معاملہ ہے جبکہ ریاست سے وابستہ کسی انتظامی ادارے کی جانب سے خطبات کے موضوعات یا ان کے مندرجات متعین کرنے کی کوشش بالکل مختلف نوعیت کی ہے۔ ایسی کوشش دراصل مذہبی معاملات میں ریاستی مداخلت کو زبردستی مسلط کرنے کے مترادف ہے، جو مذہبی آزادی کے اصولوں کے منافی ہے۔ متحدہ مجلس علماء نے وقف بورڈ پر زور دیا کہ وہ اس طرح کے غیر ضروری تنازعات اور خفیہ عزائم پر مبنی اقدامات کے بجائے اپنی انتظامی ذمہ داریوں، یعنی وقف املاک کے انتظام، دیکھ بھال اور تحفظ تک خود کو محدود رکھے، کیونکہ یہی اس کے سپرد کردہ فرائض کا بنیادی دائرہ ہے۔ متحدہ مجلس علماء جموں و کشمیر میں انجمن اوقاف جامع مسجد سرینگر، مفتی اعظم کا مسلم پرسنل لا بورڈ، دارالعلوم رحیمیہ، انجمن شرعی شیعیان، جمعیت اہل حدیث، مولانا مسرور عباس انصاری، انجمن حمایت الاسلام، جامعہ سبیل الہدیٰ بمنہ سرینگر، انجمن تبلیغ الاسلام، جمعیت ہمدانیہ، انجمن علماء احناف، دارالعلوم قاسمیہ، دارالعلوم بلالیہ، انجمن نصرت الاسلام، انجمن مظہر الحق، مرکزی رابطۂ ائمہ مساجد جموں و کشمیر، جمعیت الائمہ والعلماء، انجمن ائمہ و مشائخ کشمیر، دارالعلوم نقشبندیہ، دارالعلوم رشیدیہ، اہل بیت فاؤنڈیشن، مدرسہ کنز العلوم، ادارہ غوثیہ سرائے بالا، خانقاہِ حیدریہ عیش مقام، پیروان ولایت، اوقاف اسلامیہ کھرم سرہامہ، بزم توحید اہل حدیث ٹرسٹ، انجمن تنظیم المکاتب، محمدی یتیم ٹرسٹ، انجمن انوار الاسلام، کاروان ختم نبوت، دارالعلوم سید المرسلین، انجمن علماء و ائمہ مساجد، مدرسہ ضیاء العلوم پونچھ، فلاح دارین ٹرسٹ ویلفیئر سوسائٹی اسلام آباد، اشرف العلوم حیدرپورہ، دارالعلوم داؤدیہ بٹہ مالو، دارالعلوم فرقانیہ نوشہرہ، دارالعلوم داؤدیہ خانیار، جمعیت العلماء، سراج العلوم، ادارہ وحدۃ المکاتب، دارالعلوم امدادیہ نٹی پورہ، دارالعلوم جامعۃ الرشاد اونتی پورہ، خانقاہ مرادیہ جامع مسجد کریری، دارالعلوم صوت القرآن گلشن آباد، عوامی راحت سینٹر، امامیہ فیڈریشن کشمیر، النور ٹرسٹ بمنہ، شاہین سنڈیکیٹ سوشل ٹرسٹ، جمعیت علماء و ائمہ مساجد جموں و کشمیر، دارالعلوم سید المرسلین کولگام، دارالعلوم سراج الہدیٰ ریاسی، جامعہ مرکز المعارف بھٹنڈی جموں، مدرسہ امداد الاسلام رحمت آباد کشتواڑ، مدرسہ انعام العلوم ڈوڈہ، جامعہ محمودیہ مینڈھر، جمعیت المؤمنات مینڈھر، جامعہ انوار القرآن پونچھ، دارالعلوم مفتاح المدارس کولگام اور مدرسہ جامعہ محمدیہ دچھن کشتواڑ،جمعیت العلمائے اثنا عشریہ کرگل،جامع مسجد کشتواڑ، جامع مسجد ڈوڈہ، جامع مسجد بانہال، سمیت دیگر معاصر دینی، ملی، سماجی اور تعلیمی ادارے شامل ہیں۔