Iherezo rya Landoald Nkomeje ni ribi nkuko ndisobanuye @muhirejoseph13. @oswaki. Lando nkuko twamwitaga yari umunyamakuru wa ORINFOR Ikigo cy’igihugu cyari gishinzwe itangazamakuru akaba yari n’umuhanzi. Yari umunyakuri n’umunyeshyaka. Yishwe n’Inzego z’iperereza za Habyarimana zari ziyobowe na Augustin Nduwayezu, ararigiswa kugeza n’ubu ntabwo abe n’inshuti ze tuzi iyo yaroshywe. Ntibwari n’ubwa mbere Habyarimana akora ayo mahano kuko nirwo yishe abategetsi n’abakozi barenga 70 bakoranye na Kayibanda. Urupfu rwishwe Lando Nkomeje ni narwo rwakorewe Padri Silvio Sindambiwe wabaye umuyobozi wa Kinyamateka akanamagana wese akarengane kakorwaga na Leta mu nyandiko ze cyane cyane mu yakundwaga na benshi yitwaga BAZUMVA RYARI? Leta yishe n’abandi hagati ya 1987 na 1990 barimo Dr François Muganza, depite Felicula Nyiramutarambirwa, Diane Fossey bitaga Nyiramacibiri, Colonel Stanislas Mayuya n’abandi benshi Leta ya Ikinani yishe ibaziza guharanira ukuri. Ibi ni bimwe mu bimenyetso byariho mbere y’ urugamba rwo kubohora u Rwanda rwatangijwe na FPR byerekana ko u Rwanda rwari rugeze aharindimuka. Rwari rukeneye Umutabazi. Nabonye hari uwanditse kuri X kuri iyi nkuru arihanukira ngo “iki kigabo kirabeshya” ariko ntiyabitangira ikimenyetso byibura na kimwe, uretse gutukana. Aha Data sindangwa n’ibinyoma. Ngo bimarire iki? Erega ukuri guca mu ziko ntigushya. N’iyo kwaba kuryana ariko kuba ari ukuri kandi kugahora ari ukuri. Tukwemere niyo kwaba kuryana.

Ndi mu njyana imwe nawe @mugorewa1. Ibiganiro ku mateka y’u Rwanda binyuze mu kuri kwayaranze niyo nzira yonyine yo gukira ibikomere byatewe nayo buri wese afite. Dore zimwe mu mpamvu: 1) Muri uku kwezi kw’Ukwakira, ahabereye ibiganiro hose : Kigali, Kayonza, Nyagatare, Musanze, Rubavu, Karongi, Nyamagabe, Huye na Ruhango ababyitabiriye bahurije ku kamaro ko kuvuga ukuri no kubwizanya ukuri ku mateka yacu. Abibwira rero ko kuba ba Ndenzaho cyangwa Renzaho na Ceceka aribyo bizabakiza, bigakiza n’u Rwanda cyangwa se bakibasira aberekana ukuri, ni abashaka gukomeza koreka u Rwanda mu rwobo rwakuwemo na FPR-Inkotanyi, rukaba rugeze aheza hifuzwa n’umunyarwanda wese muzima. 2) Kuba ubushakashatsi bwerekana ko ubumwe n’ubudaheranwa bigeze kuri 95,3% bisobanuye ko tugiheranywe na 4,7%. Aha niho hakiri ibikomere, agahinda, akababaro, umujinya, urwango, ipfunwe, urwikekwe, ingengabitekerezo ya jenoside n’ibindi bikiboshye bamwe mu banyarwanda, bikabaheza mu igwingira ryatewe na politiki y’irondabwoko yakozwe na PARMEHUTU na MRND mu Rwanda kuva 1959 igasozwa na Jenoside rurangiza yakorewe Abatutsi mu 1994. 3) Ibiduherana si ibanga ni ibitekerezo biri mu mitima yacu bitarajya ahabona. Ni ibyo twita ibyo ku ishyiga. Inzira yo kubikira ni ukubishyira ahabona. Uwakoze ibidakorwa akabisabira imbabazi. Uzisabwe akagira ubutwari bwo kuzitanga. Usabye imbabazi n’uzitanze, bombi baba babaye Abadaheranwa. Uwemeye ukuri kw’amateka agatera intambwe yitandukanya n’ibibi byakozwe n’abe, niyo baba ari ababyeyi be, abavandimwe be, nawe aba abaye Umudaheranwa. Icyaha ni gatozi, iryo ni ihame ndakuka. Ariko icyaha cyakozwe n’abawe kiba gikwiye kugutera imbaraga zo kubabazwa nacyo no kwitandukanya nacyo. 4) Ibi biganiro byatweretse ko niduhagurukira rimwe twese twemye nk’abasangirangendo, duhuje ingufu n’umurava, tukanga Ceceka na Renzaho, tukaba Mucyo na Rwamucyo, 4,7% bisigaye mu bumwe n’ubudaheranwa tutarageraho tuzabinesha. Nguko uko u Rwanda ruzakira ibikomere. Ubibona ukundi NTAMPEHO. Tugire twese umunsi mwiza w’amahoro n’amahirwe. Imana y’u Rwanda ikomeze iturinde, irurinde, ruhore rwemye.