Muhammad Ali Sheikh

جناب وزیر اعلیٰ خیبر پختونخوا صاحب موضوع: حلقہ PK-71 کے انتظامی و سیاسی معاملات میں غیر متعلقہ مداخلت کے حوالے سے گزارش میں نہایت احترام کے ساتھ آپ کی توجہ ایک اہم معاملے کی طرف مبذول کرانا چاہتا ہوں، جو نہ صرف میرے حلقے بلکہ حکومتی نظم و ضبط اور تنظیمی ہم آہنگی پر بھی منفی اثرات مرتب کر رہا ہے۔ جناب، آپ کے بھائی جناب نوید مسلسل میرے حلقے کے سیاسی اور انتظامی معاملات میں مداخلت کر رہے ہیں، جس کے باعث غیر ضروری گروپ بندیاں جنم لے رہی ہیں اور ایک منتخب عوامی نمائندے کی حیثیت سے میری عزتِ نفس اور سیاسی وقار بھی متاثر ہو رہا ہے۔ میں اس معاملے پر انتہائی تحمل اور ذمہ داری کا مظاہرہ کرتا رہا ہوں۔ میں نے اس حوالے سے پانچ مرتبہ ذاتی طور پر آپ کو آگاہ کیا، چار مرتبہ صوبائی وزیر مینا خان صاحب کو اس صورتحال سے آگاہ کیا، متعدد بار براہِ راست نوید صاحب سے بھی گزارش کی، حتیٰ کہ ان کے اہلِ خانہ سے بھی تقریباً دس مرتبہ درخواست کی کہ انہیں میرے حلقے کے معاملات میں مداخلت سے روکا جائے۔ بدقسمتی سے ان تمام کوششوں کے باوجود اس مسئلے کا کوئی مؤثر حل سامنے نہیں آیا۔ صورتحال اب اس نہج پر پہنچ چکی ہے کہ اپکا نوید میرے حلقے میں باقاعدگی سے کھلی کچہریاں منعقد کرتے ہیں، ان کی صدارت کرتے ہیں اور ضلعی محکموں کے سربراہان کو ہدایات دیتے ہیں۔ متعدد مواقع پر متعلقہ افسران کو یہ کہا گیا کہ اگر وہ کھلی کچہری میں شریک نہ ہوئے تو انہیں معطل یا تبادلہ کر دیا جائے گا۔ میری مؤدبانہ گزارش ہے کہ واضح فرمایا جائے کہ وہ کس قانونی، آئینی یا سرکاری اختیار کے تحت ایسی کھلی کچہریاں منعقد کرتے ہیں، ان کی صدارت کرتے ہیں اور سرکاری افسران کو احکامات جاری کرتے ہیں۔ مزید برآں، وہ گریڈ 19 اور گریڈ 20 کے افسران کے اجلاس منعقد کرتے ہیں، انتظامی معاملات میں براہِ راست ہدایات دیتے ہیں اور میرے حلقے میں ترقیاتی منصوبوں اور اسکیموں کے اعلانات بھی کرتے ہیں، جبکہ میں نے متعدد بار صرف یہ گزارش کی کہ اگر حکومت میرے حلقے میں کوئی منصوبہ دینا چاہتی ہے تو کم از کم مجھے اعتماد میں لیا جائے، کیونکہ میں اسی حلقے کا منتخب عوامی نمائندہ ہوں۔ میری سیاسی ٹیم نے بھی اس صورتحال پر کئی مرتبہ شدید تحفظات کا اظہار کیا ہے۔ میں نے ہمیشہ انہیں صبر، تحمل اور تنظیمی نظم و ضبط کا پابند رہنے کی تلقین کی، ورنہ وہ اس طرزِ عمل کے خلاف کافی پہلے پریس کانفرنس کر چکے ہوتے۔ میری پوری کوشش رہی ہے کہ کوئی ایسا قدم نہ اٹھایا جائے جس سے حکومت یا جماعت کی ساکھ متاثر ہو۔ میں نے ہمیشہ آپ کی قیادت کا احترام کیا ہے اور حکومتی فیصلوں کو مضبوط بنانے کی کوشش کی ہے۔ آج تک میرے حلقے میں جتنے بھی ترقیاتی منصوبے منظور ہوئے یا ان کا افتتاح ہوا، افتتاحی بورڈز سے لے کر سوشل میڈیا تک ہر جگہ سب سے پہلے آپ کا نام نمایاں کیا گیا اور ہر منصوبے کا کریڈٹ آپ کی قیادت اور حکومت کو دیا گیا۔ میری ہمیشہ یہی کوشش رہی ہے کہ آپ کی قیادت اور حکومت کی کارکردگی کو مثبت، مؤثر اور ذمہ دارانہ انداز میں عوام کے سامنے پیش کیا جائے۔ لہٰذا آپ سے مؤدبانہ درخواست ہے کہ اس معاملے کا فوری نوٹس لیتے ہوئے میرے حلقے کے انتظامی اور سیاسی معاملات میں کسی بھی غیر متعلقہ مداخلت کو روکا جائے، تاکہ ایک منتخب عوامی نمائندے کی آئینی حیثیت، باہمی احترام، تنظیمی نظم و ضبط اور عوامی خدمت کے عمل کو متاثر ہونے سے بچایا جا سکے-