وسیم اختر صاحب! آپ کس دنیا میں رہتے ہیں؟ یا پھر آپ ابھی کراچی کی سیاسی تاریخ، حیدرآباد کے سانحے اور سندھ کے ان قوم پرستوں کے عزائم سے واقف نہیں ہوئے جن کی حمایت حاصل کرنے کے لیے آپ ان سے ملاقات کی خواہش ظاہر کر رہے تھے؟ آپ کے بقول، مقصد یہ تھا کہ حیدرآباد کے سانحے کے ذمہ دار اور مہاجروں کے قاتل سندھی قوم پرست قادر مگسی سے ملاقات کرکے انہیں سندھ تقسیم کیے بغیر انتظامی یونٹس بنانے کے فارمولے پر قائل کیا جائے اور ان کی حمایت حاصل کی جائے۔ سوال یہ ہے کہ آخر آپ کو کس خوش فہمی نے مبتلا کر رکھا ہے کہ جو عناصر انتظامی اختیارات کی حقیقی تقسیم اور شہری آبادی کے سیاسی و مالی حقوق تسلیم کرنے پر آمادہ نہیں، وہ محض آپ کی وضاحت سے اپنے بنیادی مؤقف سے دستبردار ہوجائیں گے؟ وسیم صاحب! مخالف کے عزائم کو سمجھے بغیر اس کی حمایت حاصل کرنے نکل پڑنا سیاسی بصیرت نہیں، خوش فہمی ہے۔ آپ کو معلوم ہونا چاہیے کہ سندھ کے قوم پرست بیانیہ میں سندھ کی وحدت کا نعرہ محض جغرافیائی حدود کے تحفظ تک محدود نہیں؛ اس کے ساتھ صوبائی اقتدار، وسائل کی تقسیم اور سیاسی اختیار پر موجودہ گرفت برقرار رکھنے کا سوال بھی جڑا ہوا ہے۔ جو قوتیں سندھ کی تقسیم کو ناقابلِ قبول قرار دیتی ہیں، وہ لازماً ایسے انتظامی یونٹس کی حمایت کردیں گی جو ان کے اپنے سیاسی اور انتظامی اختیارات کو چیلنج کریں۔ اب ذرا آپ کے فارمولے کی آئینی حیثیت پر بات کرلیتے ہیں۔ فرض کرلیجیے کہ سندھ کو تقسیم کیے بغیر کراچی اور دوسرے علاقوں میں الگ الگ انتظامی یونٹس قائم کردیے جاتے ہیں۔ ان یونٹس کو مالی خودمختاری بھی دے دی جاتی ہے، وفاق سے براہِ راست فنڈز بھی ملنے لگتے ہیں، لیکن ان کے اوپر حتمی آئینی اور انتظامی اختیار سندھ حکومت اور سندھ اسمبلی ہی کا برقرار رہتا ہے۔ تو پھر سوال یہ ہے کہ ایسے انتظامی یونٹس کس کام کے؟ براہِ راست فنڈ مل جانا، براہِ راست حکومت کرنے کا اختیار مل جانے کے مترادف نہیں۔ مالی وسائل اور انتظامی اختیارات بھی اسی وقت پائیدار خودمختاری پیدا کرتے ہیں جب ان کی بنیاد واضح آئینی ضمانتوں پر قائم ہو۔ پاکستان کے موجودہ آئینی ڈھانچے میں صوبائی اسمبلی اور مقامی حکومت کی حیثیت ایک جیسی نہیں۔ آئین کے آرٹیکل 141 اور 142 صوبائی اسمبلی کے قانون سازی کے دائرۂ اختیار اور صوبائی معاملات میں اس کے اختیارات کی وضاحت کرتے ہیں، جبکہ آرٹیکل 140-اے صوبوں کو پابند کرتا ہے کہ وہ قانون کے ذریعے مقامی حکومت کا نظام قائم کریں اور منتخب مقامی نمائندوں کو سیاسی، انتظامی اور مالی اختیارات منتقل کریں۔ لیکن آرٹیکل 140-اے کے تحت قائم ہونے والی مقامی حکومتیں الگ صوبائی حکومتیں نہیں ہیں۔ ان کے اختیارات صوبائی قانون سازی کے دائرے میں متعین ہوتے ہیں۔ انہیں صوبائی اسمبلی جیسا آئینی تشخص، صوبائی سطح کے قانون سازی کے اختیارات اور وفاقی اکائی کی حیثیت خودبخود حاصل نہیں ہوجاتی۔ لہٰذا اگر آپ انتظامی یونٹس کو محض موجودہ صوبائی نظام کے اندر قائم کرنا چاہتے ہیں تو یہ بتائیے کہ ان کی خودمختاری کو صوبائی حکومت کی مداخلت سے کیسے محفوظ رکھا جائے گا؟ اگر ان کے اختیارات صوبائی قانون کے تابع ہوں، تو کیا صوبائی اسمبلی ان اختیارات کو تبدیل یا محدود نہیں کرسکتی؟ یہی وہ بنیادی سوال ہے جس کا جواب آپ کے فارمولے میں درکار ہے۔ یہاں اصل بحث کسی کے ساتھ بیٹھنے یا بات کرنے پر اعتراض کی نہیں۔ سیاسی مکالمہ ہر جمہوری معاشرے کا حق ہے۔ اعتراض مہاجروں کے قاتل کے ساتھ بیٹھنے اور اس غیر حقیقی توقع پر ہے۔

حماد صدیقی کے دور میں شکیل عمر اور دیگر کرداروں نے نظریاتی کارکنان کو کس طرح کھڈے لائن لگایا، کس طرح سینئر اور مخلص نظریاتی ساتھیوں پر اسلحہ بردار عناصر کو فوقیت دی گئی، جنہیں ٹیم، چینل ٹو اور نیبر ہُڈ جیسے ناموں سے جانا جاتا تھا، اور کس طرح چائنا کٹنگ کے کاروبار میں ان عناصر کے کردار پر اعتراض کرنے والے کارکنان ہی نہیں، عام مہاجروں کو بھی قتل و غارت کا نشانہ بنایا گیا—کیا یہ سب کسی سے پوشیدہ ہے؟ اگر یہ حقائق کسی کو نظر نہیں آتے تو شاید مسئلہ تاریخ سے ناواقفیت کا نہیں، مصطفیٰ کمال اور انیس قائم خانی کی مخالفت میں اندھا ہو جانے کا ہے۔ اب کوئی ذرا دلیل سے سمجھائے کہ حماد صدیقی نے مہاجر قوم اور ایم کیو ایم کے لیے ایسی کون سی قربانیاں دیں جن کی بنیاد پر اسے قومی ہیرو بنا کر پیش کیا جائے؟ مہاجر قوم کسی فرد کی جاگیر نہیں، ایم کیو ایم کسی گروہ کی ذاتی ملکیت نہیں، اور نظریاتی کارکنوں کی قربانیوں پر مفادات کی سیاست کرنے والوں کو قوم کا محسن تسلیم کرنا تاریخ کے ساتھ مذاق ہے۔ حماد صدیقی کے کردار پر سوال اٹھانا اگر کسی کو مصطفیٰ کمال اور انیس قائم خانی کی حمایت دکھائی دیتا ہے تو یہ اس کی اپنی سیاسی عینک کا مسئلہ ہے۔ سوال شخصیات کی محبت یا نفرت کا نہیں، سوال یہ ہے کہ نظریے کے نام پر قربانیاں دینے والے کارکنوں کے حصے میں لاشیں آئیں تو اقتدار، اختیار اور مفادات کن کے حصے میں آئے؟