اکرم راعی Akram Raee

سیالکوٹ میں سوشل میڈیا کی ایک تقریب خوشی کے بجائے سوگ میں بدل گئی۔ ٹک ٹاکر مسٹر پتلو کی شادی کی تقریبات کے دوران بھگدڑ مچنے سے ایک شخص جاں بحق جبکہ چودہ افراد زخمی ہوگئے۔ واقعہ آج ڈسکہ روڈ پر واقع فراز سپورٹس اسٹیڈیم میں پیش آیا، جہاں مسٹر پتلو کی مہندی کے موقع پر ان کے فینز اور فالوورز کے لیے انعامات کی تقسیم اور قرعہ اندازی کا اہتمام کیا گیا تھا۔ اطلاعات کے مطابق اسٹیڈیم کا گیٹ مقررہ وقت سے پہلے کھول دیا گیا، جس کے باعث لوگوں کی بڑی تعداد اندر داخل ہونے کے لیے بے قابو ہوگئی اور دیکھتے ہی دیکھتے بھگدڑ مچ گئی۔ اس افسوس ناک واقعے میں تیس سالہ عقیل ولد بشیر احمد، رہائشی بڈھا گورایہ، شدید زخمی ہوئے اور بعدازاں ہسپتال میں دم توڑ گئے۔ زخمی ہونے والے دیگر افراد کو علامہ اقبال میموریل ٹیچنگ ہسپتال منتقل کیا گیا، جہاں بعض کی حالت تشویشناک بتائی گئی ہے۔ ریسکیو نے موقع پر پہنچ کر امدادی کارروائیاں کیں۔ مسٹر پتلو کی شادی کی تقریبات پہلے ہی خاصی تشہیر کے ساتھ منعقد کی جا رہی تھیں۔ فینز کے لیے گاڑیوں اور موٹر سائیکلوں سمیت بڑے انعامات دینے اور مستحق لڑکیوں کی شادیوں کا انتظام کرنے کے اعلانات بھی کیے گئے تھے۔ نکاح کی تقریب پہلے ہو چکی تھی جبکہ دیگر تقریبات نومبر کے پہلے ہفتے تک جاری رہنے کا پروگرام تھا۔ واقعے کی تحقیقات جاری ہیں اور پولیس کی جانب سے بڑے اجتماعات میں نظم و ضبط برقرار رکھنے کی ضرورت پر زور دیا گیا ہے۔ میری رائے میں یہ واقعہ صرف ایک حادثہ نہیں بلکہ ہمارے ہاں بڑے اجتماعات کے انتظامات اور سوشل میڈیا کی شہرت کے گرد بننے والے کلچر پر بھی سوالیہ نشان ہے۔ آپ ہزاروں لوگوں کو بلاتے ہیں، انعامات کا اعلان کرتے ہیں، بڑی تشہیر کرتے ہیں، لیکن کیا آپ کے پاس اتنے لوگوں کو سنبھالنے کی صلاحیت، مناسب سکیورٹی، داخلی اور خارجی راستوں کا انتظام اور ہنگامی صورتحال سے نمٹنے کا کوئی پلان بھی ہے؟ شہرت اور مقبولیت اپنی جگہ، لیکن لوگوں کی جانوں کی ذمہ داری اس سے کہیں بڑی چیز ہے۔ ایک شخص اپنی جان سے چلا گیا، کئی خاندانوں کی خوشیاں ماتم میں بدل گئیں۔ اب اس واقعے کی تحقیقات محض رسمی کارروائی نہیں ہونی چاہئیں، بلکہ جس کی بھی غفلت ثابت ہو، اس کا احتساب ہونا چاہیے۔