Dahlak Islands

ሓባራዊ ጸላኢ፡ ሓቢርና ንመክት! ሓደ ኢትዮጵያዊ ፡ “ቤቶም እኳ ከመሓድሩ ንዘይክእሉ በሃማት፡ ንኢትዮጵያ ክመርሑ ምፍቃድና ዓብይ ስሕተት ጌርና ኢና። ምሉእ ኢትዮጵያ ብደም ኣጨቂዮም፡ ንሱ እውን ኣይኣኸሎምን ምሉእ ቀርኒ ኣፍሪቃ ብደም ከጨፍቑ ዓጢቖም ኣለዉ። ቅልጽም ኩሉና ኣሕቢርና እንተ ዘይነቒልናዮም፡ ህዝቢ ኢትዮጵያ ጥራይ ዘይኮነ ህዝብታት ቀርኒ ኣፍሪቃ ጽባሕ-ጽባሕ ዳስ ሓዘን ምትካል ክቕጽልዎ’ዮም” ይብል። ብቕልል ዝበለ መገዲ ክውንነት ኢትዮጵያ፡ ዓንዳሪ ባህርያት “ብልጽግና”ን ዞባዊ ሓደጋኡን ዝገልጽ ዘረባ’ዩ። ንሓባራዊ ጸላኢ ብሓባራዊ መኸተ ክንስዕር፡ ቃልስና ከነወሃህድ ከም ዝግባእ ዘዘኻኽር’ውን ኢዩ። ጸላኢ፡ ኣንጻር ትግራይ፡ ኣምሓራ፡ ዓፈር ፡ ኦሮሞ፡ ሶማልን ካልኦትን፣ ሱዳን ሓዊስካ ኣብ ንጡፍ ኲናት’ዩ ዘሎ። ኤርትራ ንምውራር ዝተዓንቀረ ዘየዋደቖ ምሽብሻቡ’ውን ይቕጽል ኣሎ። ናይ’ዚ ክሳብ ሕጂ ዝካየድ ዘሎ ይኹን ዝስዕብ ኲናት ዋና ግን፡ ከም’ቲ ኣቐዲምና ዝበልናዮ እሾኽ-መርገም ቀርኒ ኣፍሪቃ ኢማራት’ያ። ኣጽዋር ትቕርብ፡ ፊናንስያዊ ደገፍ ትህብ፡ ንዜናውን ዲፕሎማስያውን ከውልታት ትተሓጋገዝ. . .ወዘተ። ካብ ታንዛንያ ክሳብ ማእከላይ ባሕሪ ዝዝርጋሕ፡ ሕልሚ ምግባት ወደባት ከተረጋግጽ፡ ከም “ብልጽግና”፡ ዳዕም ኣ’ሰሪዕን ካልኦትን ብምዕሳብ፡ ህይወት ኣሽሓት ሱዳናውያንን ኢትዮጵያውያንን ተህልቕ፣ ትሕተ ቕርጺ፡ ትካላት ማሕበራዊ ኣገልግሎት ተዕኑ፡ ወርቂ ትዘምት ኣላ። ንኤርትራ ዝሕሰብ ዘሎ’ውን፡ ይስለጦም ኣይስለጦም ከም’ዚ ኣብ ልዕሊ ጎረባብትና ዝፍጽምዎ ዘለዉ ክኸውን ከም ዝኽእል ኣይንስሕቶን። ኣብ ወርሒ ጥቅምቲ ጥራይ ካብ ኢማራት (ኣልዐይንን ወተሃደራዊ መደበር ኣልሪፍ ኣቡዳቢን) ናብ ኢትዮጵያ ( ቦሌን ኣሶሳን)፡ ወተሃደራዊ ንዋት ናይ ዝጸዓና ቦይንግ 747 ክሳብ 81 በረራታት ከም ዝበጽሕ ዝተፈላለዩ ምንጭታት ይሕብሩ ኣለዉ። እዚ ህይወት “ብልጽግና” ይኹን ዳዕም ኣ’ሰሪዕ ኣብ ደገፍ ኢማራት ተንጠልጢሉ ምህላዉ ዘረጋግጽ’ዩ። ስለ’ዚ መኸተና ኣንጻር “ብልጽግና” ጥራይ ዘይኮነ፡ ኣንጻር ኣዕናዊ ምምትእትታው ኣቡዳቢ’ውን፡ ብዝተፈላለየ ሓባራዊ ንጥፈታትን ዘመተታትን (ዜናዊ ዲፕሎማስያዊ) ክሕይል ከም ዘለዎ ግምት ክንህቦ ይግባእ። ሓባራዊ ጸላኢ፡ ሓቢርና ንመክት!