DisRespected

🚨 ایک بات میری سمجھ سے باہر ہے۔ آخر یہ ہو کیا رہا ہے؟ جو بھی شخص جیل جاتا ہے، کچھ عرصے بعد اسکی صحت کے حوالے سے کبھی آنکھوں کا مسئلہ، کبھی بلڈ پریشر، کبھی انفیکشن اور کبھی کوئی اور طبی پیچیدگی سامنے آتی ہے اور بدقسمتی سے ہم ان معاملات کو معمول کی خبریں سمجھ کر آگے چلتے چلے جا رہے ہیں! لیکن کسی کو تو سوال اٹھانا ہوگا۔ کسی کو تو ان حالات کے اندر جھانکنا ہوگا۔ آخر یہ بار بار کیوں ہو رہا ہے؟ اب عمران خان کی صحت ہی کو دیکھ لیجیے!!! 74 سال کی عمر۔ ایک ایسا شخص جس نے اپنی زندگی کا بڑا حصہ کھیل کے میدان میں گزارا، جو اپنی جسمانی فٹنس کے حوالے سے ہمیشہ پہچانا جاتا رہا۔ لیکن عمر کے اس حصے میں ماضی کی ایتھلیٹک فٹنس کسی کو طبی خطرات سے محفوظ نہیں رکھتی۔ اور جب وہ خود یہ بتا رہے ہیں کہ ادویات لینے کے باوجود ان کا بلڈ پریشر 192 تک پہنچ رہا ہے، تو یہ کوئی معمولی میڈیکل اپ ڈیٹ نہیں ہے۔ ذرا سمجھیں کہ 192 کا مطلب کیا ہے۔ یہ جسم کا درجہ حرارت نہیں، بلڈ پریشر کی اوپر والی ریڈنگ ہے۔ اور اگر یہ واقعی 192 ہے تو یہ شدید حد تک بلند بلڈ پریشر ہے۔ اب اسکا مطلب جسم کے اندر کیا ہوتا ہے؟؟؟؟ دل کو خون پمپ کرنے کے لیے کہیں زیادہ دباؤ برداشت کرنا پڑتا ہے۔ وقت کے ساتھ دل کے پٹھے متاثر ہو سکتے ہیں، ہارٹ اٹیک اور ہارٹ فیل ہونے کا خطرہ بڑھ سکتا ہے۔ دماغ کی باریک شریانیں اس دباؤ کی زد میں آ سکتی ہیں۔ کوئی شریان پھٹ جائے یا بند ہو جائے تو نتیجہ برین ہیمرج یا اسٹروک کی صورت میں نکل سکتا ہے۔ اور اسٹروک صرف ایک طبی اصطلاح نہیں؛ یہ انسان کی بولنے، چلنے، سوچنے اور اپنی زندگی خود گزارنے کی صلاحیت تک چھین سکتا ہے۔ آنکھوں پر اسکے اثرات بھی انتہائی سنجیدہ ہو سکتے ہیں۔ ہائی بلڈ پریشر ریٹینا کی خون کی نالیوں کو نقصان پہنچا سکتا ہے اور بینائی مستقل طور پر متاثر ہو سکتی ہے۔ جب ایک آنکھ کی بینائی پہلے ہی متاثر ہو چکی ہو تو اس معاملے کو مزید احتیاط سے دیکھنے کی ضرورت ہے۔ گردے بھی اس سے محفوظ نہیں رہتے۔ انکی باریک خون کی نالیاں متاثر ہوتی ہیں، گردوں کی کارکردگی کم ہو سکتی ہے اور طویل عرصے میں گردے فیل ہونے تک کا خطرہ پیدا ہو سکتا ہے۔ اور یہاں ایک اور پہلو ہے جسے نظرانداز نہیں کیا جا سکتا: مسلسل ذہنی دباؤ، قید تنہائی، نیند کی کمی اور نفسیاتی اذیت۔ یہ سب بلڈ پریشر کو مزید خراب کر سکتے ہیں!!! اب میرا سوال بالکل سادہ ہے۔ اگر اگست میں ڈاکٹرز نے ادویات تجویز کی تھیں، اور اسکے باوجود بلڈ پریشر 192 تک پہنچ رہا ہے، تو کیا انکی دواؤں کا دوبارہ جائزہ لیا گیا؟ کیا انکا بلڈ پریشر مسلسل مانیٹر ہو رہا ہے؟ کیا آنکھوں، دل، دماغ اور گردوں کے حوالے سے مکمل طبی معائنہ کیا جا رہا ہے؟ کیا انہیں ضرورت کے مطابق ماہر ڈاکٹروں تک رسائی حاصل ہے؟ نہیں نہیں نہیں نہیں اور سب سے اہم بات: کیا انہیں بروقت اور مناسب طبی سہولیات میسر ہیں؟ نہیں میں یہ نہیں سمجھتی کہ ہمیں کسی ایسے نقصان کا انتظار کرنا چاہیے جس کی تلافی ممکن نہ ہو۔ 192 کی ریڈنگ ایسی چیز نہیں جسے یہ کہہ کر نظرانداز کر دیا جائے کہ دوا تو دی جا رہی ہے۔ اس سطح پر فوری طبی جائزہ فوری ضروری ہے۔ یہ عمران خان ہونے یا نہ ہونے کا معاملہ نہیں ہے۔ یہ ایک 74 سالہ انسان کی زندگی کا معاملہ ہے۔ آج سوال عمران خان کی صحت کا ہے۔ کل کسی اور کا ہو گا! سیاسی اختلاف اپنی جگہ، لیکن کسی انسان کی صحت کو سیاسی بحث کا حصہ بنا دینا، یا اسکے بگڑنے کا انتظار کرنا، کسی بھی معاشرے کے لیے انتہائی خطرناک رویہ ہے۔ کسی کو تو بولنا پڑے گا۔ کسی کو تو جواب مانگنا پڑے گا۔ کیا ہم کسی ناقابل تلافی سانحے کے بعد ہی جاگیں گے؟؟؟؟؟