J.M ZE

*الٹی گنتی شروع، مگر کس کس کی؟ مملکت خداد اسلامیہ کے خلاف مجرمانہ عملیات ہیں کہ نہ ختم ہونے کو ۔ حکومتی ایوانوں میں "مقابلۂ منافقت" جوبن پر ہے، آپس میں لڑائی یعنی گھمسان کا رن پڑ چکا ہے۔ شاید قسمت کی دیوی عمران خان پر مہربان کہ By Default کوئی اور آپشن بچنا ہی نہیں ہے۔ میرے کاغذوں میں ہم جہاں آج جس حال کو پہنچے ہیں اس میں عمران خان شہباز شریف سمیت دیگر سیاسی جماعتیں برابر کی شریکِ جُرم ہیں۔ آج کے ہائی برڈ نظام کو انہی کا کند ھا میسر رہا ۔ پچھلے چند مہنوں میں پاکستانی سیاست کئی انگڑائیاں لے چکی ہے۔ چھ نہروں پر تلخی کے اثرات ابھی بدرجہ اتم موجود تھے کہ نمائندہ خصوصی محسن نقوی کی فرمائشی تقریر نے صوبہ سندھ کی پیالی میں پھرسے طوفان برپا کر دیا، نئے صوبوں یا انتظامی یونٹس کی متنازع بحث چھیڑ دی، اسٹیبلشمنٹ سے پیپلز پارٹی کی محاذ آرائی کو ہوا دی ،پیپلز پارٹی نے اس دفعہ بھی منہ توڑ جواب دیا۔موصوف اس سے پہلے اپنی ہی حکومت کے نظام کے انہدام کا مژدہ سُنا دیا ، خیبر پختونخوا میں گورنر راج لگا کر بیٹھے بٹھائے پی ٹی آئی کا درد سر اپنے ذمہ لے لیا، جو کسر رہ گئی تھی مولانا فضل الرحمٰن سے ٹکراؤ نے پوری کر دی، چوہدری سالک نے مریم نواز کی حکومت پر جو کرپشن کے الزامات لگائےاس کے پیچھے بھی محسن نقوی بطور بھائی موجود ہیں ، سونے پر سہاگہ چند ہفتے قبل محسن نقوی کا پیٹی بھائی فیصل واوڈا کا شہباز شریف کو چھ ماہ کا نوٹس کہ "ٹھیک ہو جاؤ، ورنہ چھٹی!" یہ سب بحران "آدم میڈ" ، کُُھرا پکڑیں تو نقش پا یعنی ڈانڈے ایک ہی جگہ جا کر ملیں گے۔ قسمت کا پھیر ہو یا حالات کا جبر ، عمران خان کے سوا کوئی اور آپشن دکھائی نہیں دیتا۔ کیا عمران خان سے صلح کے علاوہ بھی کوئی اور چارہ ہے؟ جتنا چاہیں منافقت کا مقابلہ کر لیں، منہدم نظام پر ایک دوسرے کو پچھاڑنے کا جو دنگل شروع ہے وہ سب ۔ ضروری نہیں کہ یہ سب کسی ایک ماسٹر پلان کا حصہ ہو۔ ممکن ہے ایک دو سیاسی چالیں ہوں، ایک آدھ میں اندرونی انتشار یا باہمی مفادات کا ٹکراؤ ہو، اور باقی کچھ مسلسل غلط فیصلے ہوں۔ لیکن ان سب کا مجموعی نتیجہ ایک ہی ہے: مقتدرہ سیاسی دلدل میں مزید دھنستی جا رہی ہے۔ اس کا نتیجہ یہ نکلا کہ اسٹیبلشمنٹ پر سیاسی جماعتوں کا اعتماد مزید متزلزل ہوا۔ پیپلز پارٹی سے تعلقات میں دراڑ گہری ہوئی، خیبر پختونخوا میں ایک نیا اور زیادہ پیچیدہ بحران جنم لے چکا، اور مولانا فضل الرحمٰن کے ساتھ غیر ضروری محاذ آرائی نے ایک اور سیاسی محاذ کھول دیا۔ ماضی کے جھروکے میں کہ جنرل پرویز مشرف کا 2007ء میں چیف جسٹس افتخار محمد چوہدری کے خلاف اقدام اس کے اقتدار کو لے ڈوبا 13مارچ 2007جنرل مشرف کے زوال کا آغاز ثابت ہوا۔ آج کے حالات اس سے کہیں زیادہ سنگین بحران کی طرف اشارہ کر رہے ہیں۔ مقتدرہ کو اپنےبہی خواہوں خیر خواہوں پر کڑی نظر رکھنا تھی جو ہمیشہ اپنے بزڑوں کو مرواتے آئے ہیں ، مجھے لگتا ہے اب دیر ہو چکی ہے۔ وطنی عدم استحکام دوچند ہو چکا ہے اور واحد راستہ عمران خان اور دوسری ساری قومی سیاسی قوتوں کو یکجا کر کے مفاہمت کا رسدتہ نکالنا ہو گا ، آن بورڈ کرنا ہو گا۔ ضروری نہیں کہ ہر واقعہ کسی منصوبہ بند سازش کا حصہ ہو۔ کبھی کبھی سیاسی جماعتیں اپنے مفادات کے تحت چالیں چلتی ہیں، اقتدار کے ایوانوں میں غلط اندازے اور غلط فیصلے نافذ ہو جاتے ہیں اور کبھی انسان اپنے ہی اقدامات کے نتائج کو سمجھنے سے قاصر رہتا ہے۔ مگر ان سب کے مجموعے سے قدرت اپنا ایک الگ عمل شروع کر دیتی ہے۔تاریخ کافیصلہ کہ طاقت کے نشے میں مبتلا حکمرانوں کو گرانے کے لیے کسی انقلاب یا بیرونی سازش کی ضرورت نہیں پڑی؛ ان کی اپنی غلطیاں ہی ان کے زوال کا راستہ بنتی چلی گئیں۔ مجھے محسوس ہوتا ہے کہ آج کے مقتدر حلقوں کے کرتا دھرتاؤں کے معاملے میں بھی قدرت کا اپنا نظامِ احتساب حرکت میں آ چکا ہے۔ طاقت کے نشے میں فیصلے عقل، تدبر اور سیاسی بصیرت سے محروم ہو جائیں تو قدرت اپنا حساب خود شروع کر دیتی ہے۔سوال یہ نہیں کہ یہ کھیل کون جیتے گا، سوال یہ ہے کہ اس کھیل کے اختتام پر تاریخ کے کٹہرے میں کون بطوربڑا مجرم کھڑا ہوگا۔ طاقتوروں کو مخالفین نہیں گراتے، ہمیشہ اپنے یا پھر اپنی غلطیاں ان کے زوال کا راستہ ہموار کرتی ہیں۔الٹی گنتی شروع ہے، تجسس اتنا کہ سب سے پہلے کون قدرت کے فیصلے کی زد میں آنے کو، ایک دو یا پھر سارے ؟۔